Украина мудофаа вазири Валерий Гелетей Украина армияси Қрим ярим оролини қайтариб олиб мамлакат яхлитлигини қайта тиклашини маълум қилди.
Украина пойтахти Киевда ташкил қилинган мажлисда сўзга чиққан вазир “Украинанинг Севастополида ғалаба парати ўтказилади”, дея билдирди.
Шунингдек, Украина ташқи ишлар вазирлиги ҳам Россия Қрим ярим оролини ўз таркибига қўшиб олгандан сўнг Қрим татарларининг аҳволи кундан кунга ёмонлашиб бораётганини билдирди.
Украина ташқи ишлар вазирининг ўрин босари Данило Лубкивский пойтахт Киевда ташкил қилинган матбуот анжуманида берган баёнотида Москва ҳукуматини айирмачиликда айблаб, Украина Қримда юзага келаётган ҳодисаларни қайғу билан кузатиб бораётганини билдирди.
Россия Қрим ярим оролини ўзига қўшиб олгандан сўнг Қрим татарларининг деярли ҳар он таҳқирлашга дуч келаётганини айтиб ўтган Лубкивский Қримда Украинага қарши ва мусулмонларга қарши амалиётлар кучайиб бораётганлигини қайд этди.
Лубкивский Қрим татарларининг совет иттифоқи даврида Сталин тарафидан Ўрта Осиёга сургун қилинганлигининг 70 йиллиги муносабати билан ўтказилган тадбирларга рус ҳукумати тарафидан чекловлар қўйилганлигини тилга олар экан, бунга ўхшаш ҳодисалар рус ҳукуматининг Қрим халқига нисбатан этник камситувчи муносабатда бўлаётганига далил эканлигига урғу берди. Вазир ўрин босари бутун дунё бугунги кунда мустамлакачи Россия юзага келтирган таҳдидни тушиниб етиши лозимлигини таъкидлади.
Россия ҳукумати Украинага қарашли бўлган Қрим ярим оролини шу йилнинг 16 март куни ўтказилган ва Қрим татарлари байкот қилган референдум натижасига таянган ҳолда ўзига қўшиб олган эди.
