Туркия президенти Ражаб Тоййиб Эрдоган Россия самолёти Су-24 уриб туширилгани учун узр сўраб Россия президенти Владимир Путинга мактуб ёзган. Бу ҳақда президентнинг матбуот хизмати раҳбари Дмитрий Песков маълум қилди.
“Россия Федерацияси президенти Владимир Путинга Туркия президенти Эрдогандан келган мурожаатда Туркия етакчиси Россия ҳарбий самолёти ҳалокати билан боғлиқ вазиятни изига туширишга қизиқиш билдирди”,- деди Песков.
Қайд этилишича, Туркия президенти ўз мактубида Су-24 учувчисининг ўлими учун ҳамдардлик билдирган.
Песковнинг таъкидлашича, Эрдоган мактубда “узр” сўзини ишлатган.
“Мен қурбон бўлган россиялик учувчи оиласига яна бир бор ўзимнинг ҳамдардлигимни изҳор қилиб, чуқур таъзия билдираман ва кечирим сўрайман. Бутун юрагим билан уларнинг дардига шерикман. Россиялик учувчи оиласини турк оиласи сифатида қабул қиламиз. Еткизилган қайғу ва зарарни қоплаш учун биз ҳар қандай ташаббусга тайёрмиз”,- дейилади Эрдоган йўллаган хатда.
Россия раҳбарига йўлланган мактубда Туркия раҳбари Анқаранинг Россия билан муносабатларни барбод қилишни истамаслиги ҳақида ҳам ёзилган.
Ўз хатида Эрдоган “Россия ва Туркия учун одатий бўлган дўстона муносабатларни тиклаш учун зарур бўлган барча ишни қилишга, шу билан бирга ҳудуддаги можароларни бартараф этиш учун биргаликда ҳаракат қилишга ҳамда террорчиликка қарши ҳамкорликка тайёр эканини” таъкидлаган.
Шунингдек, мурожаатда Эрдоган россиялик ҳарбийнинг ҳалокатига алоқадор Туркия фуқаросига нисбатан тергов ишлари давом этаётганини уқтиргани айтилган.
Бундан олдинроқ, Туркия бош вазири Биноли Йилдирим “Россия билан муносабатлар илиқлашиши” жараёни кетаётганини айтиб ўтган эди.
