Сурия миллий мулоқот конгрессида иштирок этадиган мухолифат вакилларининг рўйхати эълон қилинди
Шу кунларда Суриянинг Идлиб шаҳри аҳолисини қирғин қилаётган Россиянинг мезбонлигида ҳамда Эрон ва Туркиянинг қўллаб-қувватлови остида Сурияда сиёсий ўтиш даври масаласини муҳокама қилиш учун “Сурия миллий мулоқот конгресси” иш бошлади. Бу конгрессга таклиф этилганлар рўйхатида Сурия мухолифати вакилларидан 300га яқин кишининг исми мавжуд.
“NTV” ахборот агентлиги тарқатган хабарга кўра, Сурия мухолифати вакиллари Сочига Женева, Анқара, Миср ва Дамашқдан келади. Рўйхатда Туркия томонидан олға сурилган 80-100 нафар кишининг ҳам исми бор. Женевадан жами 113 кишига, Дамашқдан 44 кишига, Қоҳирадан 29 кишига таклифнома юборилган. Мустақил равишда иштирок этадиган мухолифат вакилларининг сони 10 кишинидан иборат. Сурия курд миллий кенгашидан 24 кишининг иштирок этиши кутилмоқда.
Рўйхатда 67 нафар аъзога эга Туркиядаги мухолифатнинг энг йирик гуруҳи ҳисобланган “Сурия миллий коалицияси”дан фақат 4 кишининг номи келтирилган. Гуруҳ раҳбари ва бош котиби таклиф қилинмаган. Шунингдек, “Сурия олий кенгаши”нинг раиси Наср ал-Ҳаририйнинг номи ҳам таклиф этилган меҳмонлар орасида йўқ. “Сурия миллий коалицияси”нинг собиқ раиси Аҳмад Жарбанинг гуруҳидан таклиф этилганларнинг сони эса 54тага етди.
Сочида ўтказилаётган демократик “Сурия миллий мулоқот конгресси”га жами 1500 киши, жумладан Асад режимининг вакиллари ҳам иштирок этмоқда. Иштирокчиларнинг исмлари интернет сайтларда бирма-бир эълон қилинди.
Сурия мухолифати томонидан ташкил қилинган “музокаралар олий қўмитаси” Сочидаги “Сурия миллий мулоқот конгресси”га иштирок этмаслигини эълон қилган эди. Хабарларда айтилишича Туркия ҳукумати Сурия мухолифати вакилларини конгрессга иштирок этишга тарғиб қилган.
Кремл матбуот котиби Дмитрий Песков эса баъзи кимсаларнинг “Сурия миллий мулоқот конгресси”га иштирок этмаслиги конгресснинг аҳамиятига путур етказа олмаслигини билдирди. Песковга кўра, бу конгресс Сурия масаласини ҳал қилиш йўлидаги муҳим қадам бўлади.
