Лондонда Мусулмонлар ёнғинда қолган инсонларнинг жонига оро кирди
Муборак рамазон ойининг рўзасини тутиш учун саҳарликка турган мусулмонлар жуда кўп инсонларнинг ҳаётини сақлаб қолди. Англия пойтахти Лондонда 12 кишининг ҳаётига зомин бўлган ва 50 кишининг тан жароҳати олишига сабаб бўлган ёнғинда атрофдаги мусулмонлар саҳарлик қилиш учун уйғоқ бўлганлиги туфайли жуда кўп инсонларнинг ёнғиндан қутилиб қолишига сабаб бўлди. Гувоҳларга кўра, 120 ҳонадон жойлашган ва юзлаган инсонлар ҳаёт кечираётган бинодаги ёнғинда вазият оғирлашиб, талофат ортмаслиги учун ҳаракат қилганлар орасида энг фаол жонбозлик кўрсатганлар мусулмонлар бўлган.
Independent ахборот агентлигига интервью берган гувоҳлардан бирининг айтишича, маҳаллий вақт билан 00:54да, яъни айни уйқу вақтида бошланган ёнғинда хавф сигналининг овози жуда паст чиққанлиги сабабли бинода яшайдиганларнинг уйғониши қийин бўлган. Саҳарлик қилиш учун уйғоқ бўлган мусулмон қўшнилари уларнинг жонига оро кирган.
“Ёнаётган бинодан инсонларни олиб чиқиш учун Мусулмонлар катта рол ўйнади. Ёрдамга ўзини урган инсонларнинг жуда кўпи мусулмонлар эди. Бундан ташқари улар озиқ-овқат ва кийим-кечак ҳам олиб келишди”, деди гувоҳ.
Бошқа бир тарафдан масжидлар ҳам ёнғиндан жабр кўрган инсонларга ёрдам учун ҳаракатга киришди. “Диндор ёки динсиз бўлишидан қатъий назар, дам олиш ёки ухлашни истаган ёки озиқ-овқат ва ичимликларга мухтож бўлган ҳар қандай кишига эшигимиз очиқдир”, дейилди Ал-Минор жоме масжиди тарафидан берилган баёнотда. Масжид хизматчилари ва кўнгиллилар ҳам ёнғин юз берган минтақага озиқ-овқат ва сув олиб келишди.
