Хорижликларни қўрқитиш орқали пул ундириб юрган милиция ходимлари қўлга олинди
Ленин туман Ички ишлар бошқармаси матбуот котиби Адил Оморовнинг “Азаттык” радиосига маълум қилишича, Бишкекда чет эллик фуқароларни қўрқитиб пул талаб қилишда гумонланган милиция ходимлари икки ойга қамоққа олинган.
Унинг сўзларига кўра, 29-март куни Покистон фуқароси милицияга ариза билан мурожаат қилиб, Чуй кўчасидаги кафелардан биридан чиқиб келаётган вақтда милиция ходимлари телефонини олиб қўйишганини айтган. Қидирув ишлари давомида гумондорлар аниқланиб, бир қиз ва икки нафар милиция ходими қўлга олинган. Тергов мобайнида улар асосан хорижликларни қўрқитиб пул ундириб келишгани маълум бўлган. Бир нечта жабрланувчи аниқланган.
Жабрланувчилар кафеларда қиз билан танишишгани кейин мехмонхонага боришгани, у ерда қиз бақириб, телефон қилгани, бир оз вақтдан сўнг милиция ходимлари келиб, хорижликларни қўлга олишгани ва пул талаб қилишганини айтиб беришган.
Хабарда айтилишича, қамоққа олинган милиция ходимларини иккаласи ҳам 1990-йилда туғилган. Бири ИИВ қўриқчилик бошқармасида, иккинчиси Бишкек шаҳар патрул милициясида хизмат қилишган.
Жиноятга алоқаси бор деб гумон қилинган яна бир тартиб соқчиси қидирилмоқда. Шунингдек, Свердлов туман милициясининг бир ходими гувоҳ сифатида иштирок этмоқда.
