Де Мистура “Женева 4” музокараси учун қаттиқ ҳаракат олиб бормоқда
Бирлашган Миллатлар Ташкилотининг Сурия масаласи бўйича хос вакили Стаффан де Мистура 20 Феврал куни ўтказилиши белгиланган “Женева 4” музокараси иштирокчиларига бир неча кун ичида таклифнома юборади. Бу ҳақида БМТ бош котибининг нотиғи Стефан Дужаррик маълум қилди.
“Бир неча кун ичида таклифномалар юборилади. Бу мураккаб жараён бўлиб, кўп одамлар билан музокаралар ва маслаҳатлашувлар олиб борилишини талаб қилади. Де Мистура ва унинг жамоаси бу йўлда ишлашни жадал суратда давом эттирмоқда”, деди Дужаррик журналистларга.
Де Мистура агар мухолифат вакиллари БМТ ҳомийлигида ўтадиган тинчлик музокараларига иштирок этадиган вакилларни 8 февралгача тайинламаса, Мистуранинг ўзи делегатларни белгилаши ҳақида мухолифатни огоҳлантирган эди. Бу эса мухолифат ичида норозиликларга сабаб бўлди. Дужаррикнинг қайд этишича, Мистура Сурия мухолифатига берган ушбу огоҳлантиришидан воз кечган.
Стаффан де Мистура Сурияда ўтиш даври уч босқичдан иборат бўлиб, муваққат ҳукуматни тузиш ва конституцияни шакллантиришни ўз ичига олишини билдирди. Шунигдек Мистура ал-Арабия телеканалига берган интервьюсида Женева музокараларида Араб Лигасининг ҳам иштирок этиши муҳим аҳамиятга эгалигини ва бу фикрини БМТ Хавфсизлик Кенгашига тақдим қилганлигини билдирди. “Сурия Араб дунёсидаги мамлакатдир. Шунинг учун Женева музокараларда Араб Лигасининг иштирок этиши зарур”, деди Де Мистура.
Бундан аввал Сурия мухолифатининг номигагина ҳарбий ва сиёсий вакиллари Женева учрашувига тайёргарлик кўриш учун Анкарада тўпланган эди. Мухолифат делегациясининг раҳбари Муҳаммад Аллуш Сурия масаласида Остона йиғилишида илгари сурилган талаблар бажарилмаган тақдирда Женевада бўлиб ўтадиган мажлисда иштирок этмаслигини билдирди. Аллушга кўра, Остона йиғилишида берилган ваъдалар ҳануз бажарилмаган.
