Британиянинг Европа Иттифоқи таркибида қолиши ёки уни тарк этиши борасида референдум бўлиб ўтди. Референдумда инглиз халқининг кўпчилиги Британиянинг Европа Иттифоқидан ажралиб чиқишини ёқлаб овоз берди. Бироқ референдум натижаси Европадаги сиёсий етакчиларни хурсанд қилмади
Германия канцлери Ангела Меркел Британиянинг Европа Иттифоқини тарк этишига оид қарорини Европа учун яхшилик аломати эмаслигини билдирди. Меркел Федерал мажлисда Британиянинг Европа Иттифоқидан ажралиб чиқиш қарори ҳақида баёнот берар экан, унинг бу қарорини қайғу билан қабул қилганлигини айтиб, “Бугун Европа учун ва Европани бирлаштириш жараёни учун чекиниш нуқтаси бўлди”, деди.
Бундан буёғига хотиржам вазиятни таҳлил қилиш зарурлигини таъкидлаган Меркел бу борада тўғри қарорлар қабул қилиш зарурлигини қайд этди. Маркелга кўра, бу қарорнинг келажакда қандай оқибатларга сабаб бўлиши қолган 27 давлатнинг хулоса чиқаришларига боғлиқ. Акс ҳолда бу Европа Иттифоқининг парчаланиб кетишига сабаб бўлиши ҳам мумкин.
“Европада хилма хиллик бор. Европадаги одамлар қанчалик бир биридан фарқ қилса, Европа Иттифоқидан кутилган ишлар ҳам худди шундай фарқлидир”, деди Германия канцлери Ангела Меркел.
Кўпинча Европанинг бирлашиш жараёнига шубҳа билан қараб келганини билдирган Маркел бу шубҳа нафақат Британияга оид, балки бошқа аъзо давлатларга ҳам оид эканлигини билдирди.
АҚШ президенти Барак Обама эса Британияда ўтказилган референдум натижалари ҳақида гапириб, Инглиз халқининг қарорига ҳурмат билан қарашини билдирди.
Обама АҚШ билан Британия ўртасидаги “хос алоқалар”нинг давом этаётганини билдирар экан, Британиянинг НАТО иттифоқига аъзолиги ва АҚШнинг хавфсизлик, иқтисодий ва ташқи сиёсати учун муҳим ўрин эгаллашини таъкидлади. Шунингдек, АҚШнинг Европа Иттифоқи билан ҳам муносабатлари жуда яхши эканлигини айтиб ўтган Обама, Британиянинг АҚШ учун воз кечилмас ҳамкор бўлиб қолишини қўшимча қилди.
