Ватан ҳимоячилари кунига бағишлаб шанба куни Кремлда ўтган маросимда сўзга чиққан Россия президенти Владимир Путин рус ҳарбийлари Сурияда очиқчасига Россияни душман деб атаётган ҳамда Россия ва МДҲ давлатларига кенгайиш режаларини яширмаётган жангариларни йўқ қилишаётганини айтиб ўтди.
“Сурияда олиб борилаётган ҳарбий амалиётлар аскарларимизнинг ҳарбий маҳоратини юксалтириб бормоқда. Бизнинг аскар ва зобитларимиз Яқин Шарқда жанг олиб борар эканлар Россия манфаатларини ҳимоя қилишмоқда ва очиқчасига ватанимизни душман деб атаётган ҳамда Россия ва МДҲ давлатларига кенгайиш бўйича режаларини яширмаётган жангариларни йўқ қилишмоқда”, – деди Путин.
Унинг қайд этишича, ҳарбий космик кучлари учувчилари, ҳарбий бўлинма денгизчи ва аскарларининг ҳарбий хизматлари юксак таҳсинга сазовор.
“Улар мураккаб шароитда Сурия ҳукумат қўшинига, аксилтеррор коалицияси аъзоларига жангариларни тор-мор этишда, тинч аҳолини зўровонлик, ваҳшийлик ва зулмдан халос этишда ёрдам кўрсатишмоқда”, – дея таъкидлаб ўтди Путин.
Туркистон:
Владимир Путин бошчилигида олиб борилган сиёсат натижасида Россия иқтисоди инқироз ёқасига келиб қолди. Хусусий мулкни чекланиши, завод ва фабрикаларни давлат назорати остига олиниши одамларда давлат мулкига нисбатан эътиборсизликни пайдо қилди, рақобат ва изланишни томирига болта урди. Чунки инсон ўзиники бўлмаган нарсага эътиборсиз бўлиши табиий. Собиқ шўролар иттифоқини инқирозга юз тутишига асосий сабаблардан бири ҳам айнан шу бўлган эди. Рақобатни йўқолиши натижасида Россияда ишлаб чиқарилган махсулотлар нафақат Европа давлатлари, балки Марказий Осиёда ҳам ўтмайдиган матоҳга айланиб қолди.
Шу сабабли ҳам Путин аввал Божхона иттифоқи деб номланган, кейинчалик Евроосиё иқтисодий иттифоқига айланган иттифоқни ташкил этди. Бундан кўзланган мақсад эса Хитой, Туркия ва Европа давлатларидан келаётган маҳсулотларни бу иттифоққа аъзо давлатларга киришига чеклов киритиш ва ўзини ҳеч кимга керак бўлмай қолган, замон талабларидан ортда қолиб кетган маҳсулотлари учун истеъмол бозорини ташкил этишдан иборат эди. Аммо кўрилган бу чоралар ҳам Россия инқирозини олдини ололмаслиги кўрина бошлагач, Путин рус халқининг Улуғ ватан уруши йилларидан синовдан ўтган эски услуби ватанпарварлик ва миллатчилик робитаси фойдаланишга қарор қилди. Чунки Путин ва унинг командасини фақатгина уруш ва нотинчликлар қутқариб қолиши мумкин эди. Шу мақсадда Путин рус халқи ва русийзабонларни ҳуқуқини ҳимоя қилиш баҳонасида Қримни босиб олди. Донецк ва Луганскдаги айирмачиларни қўллаб-қувватлай бошлади. Бунинг ортидан кутилганидек, рус халқини Путинга нисбатан йўқола бошлаган ишончи ва хурмати қайта тиклана бошлади.
Бироқ АҚШ бошчилигидаги Европа давлатларини Россияга қарши қўллай бошлаган жазо чоралари шундоқ ҳам ночор бўлган рус иқтисодини янада қийин аҳволга солиб қўйди. Бундан қутулиш учун эса Путин Донецк ва Луганскдаги айирмачилардан воз кечиш эвазига Сурия жаллоди Башар Асадга ҳарбий ёрдам кўрсатишга Барак Обамадан рухсат олди. Бунга сабаб Путинга қаерда ва ким бўлишидан қатъий назар уруш керак.
Гарчи Путин Сурияга “ИШИД”га қарши курашиш баҳонасида бостириб кирган бўлишига қарамай, рус ҳарбий космик кучларининг асосий нишони тинч фуқаро, ёш болалар ва аёллар бўляпти. Шунга қарамай Путин ҳеч нарсадан уялмай “Сурияда олиб борилаётган ҳарбий амалиётлар рус аскарларининг ҳарбий маҳоратини ошиб бораётгани”ни айтмоқда.
Бундан ташқари, Путин “ИШИД” ваҳимасини бўрттириб кўрсатиш орқали собиқ мустамлакалари, хусусан Марказий Осиё давлатлари назоратини ўз қўлида сақлаб қолишга ҳаракат қилмоқда. Путин бу каби баёнотлар билан биринчи марта чиқаётгани йўқ. 2015 йилнинг 16 октябр куни Қозоғистоннинг Бурабай шаҳрида бўлиб ўтган МДҲ раҳбарлари саммитида Путин “ИШИД сафида ҳозирда Россия ва МДҲ давлатларидан чиққан 5 мингдан 7 минггача одам жанг қилаётгани”ни айтиб ўтган эди.
