Суриялик мўътадил мухолифат вакилларини ҳарбий машқдан ўтказиш лойиҳасидан кўзланган мақсад рўёбга чиқмай қолди. Бу ҳақида ҳарбий машқдан ўтказиш лойиҳаси устидан масъул шахс суриялик полковник Недим Ҳасан маълум қилди. Недим Ҳасанга кўра, аввалда 5000 кишини ҳарбий машқдан ўтказиш режалаштирилган. Аммо бу рақам 54 кишининг машқдан ўтиши билан ниҳоясига етган.
“Илк лойиҳада биздан 5000 кишилик номзодлар рўйхатини талаб қилишди. Дарҳол Сурия ичида ишга киришдик. Қисқа вақт ичида 3500 кишининг рўйхатини тузиб АҚШлик масъулларга топширдик. Бу рўйхатда келтирилганлардан 800 кишининг машқдан ўтишга тайёр туриши талаб қилинди. Сўнгра ўзлари олиб борган терговлар натижасида бу рақам 350 тага камайтирилганлигини айтишди. Бунинг ортидан фақат 154 киши ҳарбий машқни давом эттиришди. Буларнинг 100 нафари Иорданияда, 54 нафари эса Туркияда машқдан ўтаётган эди. Иорданиядаги лагерда машқдан ўтаётган 100 киши АҚШликлар тарафидан маъқул кўрилмаганлиги учун муддатидан аввал ҳарбий машқ тўхтатилиб, улар Сурияга қайтариб юборилди. Туркиядаги 54 киши ҳарбий машқни тўлиқ тамомлаб 2015 йилнинг июль ойида Сурияга йўл олди. Шуни айтиб қўйиш лозимки, шу кунгача (8 ой мобайнида) бор йўғи 54 аскаримиз ҳарбий машқдан ўтди холос”, деди Недим Ҳасан.
Кейинги олинган хабарга кўра, мана шу 54 кишидан 18 таси мужоҳидларнинг қўлига асир тушган. Сурия туркман миллий ҳаракат партияси раҳбарининг ёрдамчиси Ториқ Жевизчининг айтишича, АҚШ назорати остида ҳарбий машқдан ўтган 18 нафар мухолифатчи Жабҳатун Нусра гуруҳи томонидан кўлга олинган. Уларнинг орасида юқоридаги маълумотларни берган Недим Ҳасан ҳам бор.
Бу ҳодисадан бироз ўтиб, улардан яна 8 киши қўлга олинди. Ишончли манбалардан олинган хабарларга кўра, ҳарбий машқдан ўтган мухолифатчилар билан Жабҳатун Нусра гуруҳи ўртасида бўлиб ўтган жангда мухолифатчилардан 5 таси ўлдирилган, 16 таси яраланган ва яна 8 таси қўлга олинган. Энди ҳарбий машқдан ўтган 54 аскардан қанчаси қолганлигини ўзингиз ҳисоблаб кўраверинг.
