Афғонистонда ўзаро жангларни тўхтатиш мақсадида афғон ҳукумати вакиллари ва Толибон ҳаракати вакиллари иштирокида Қатарда ташкил қилинган учрашув самарасиз якун топди. Хабарларга кўра, Толибон ҳаракати АҚШ харбийларининг мамлакатдан чиқиб кетишини талаб қилган. Аммо афғон ҳукумати бу талаблар қондирилишини қатъиян рад этган.
Қатар ташқи ишлар вазирлиги тарафидан уюштирилган норасмий учрашувда Афғонистондаги тинчлик музокараларини дастаклаган АҚШ ва Покистондан келган вакиллар ҳам иштирок этди. Толибон масъулларидан бири Толибон тарафидан саккиз кишилик бир ҳайъат йиғилишда иштирок этганлигини маълум қилди.
Имси ошкор қилинишини истамаган Толибон масъулларидан бирининг билдиришича, Толибон тарафи қўйган талаблар ёзма равишда йиғилишда иштирок этган кишиларга тақдим этилган. Афғон ҳукумат вакилларининг талабларига кўра эса, Толибон тараф уларга “Биродарларимиз” дея мурожаат қилишлари ва Афғонистон конституциясини тан олишлари лозим.
Толибон вакилларининг таъкидлашича, модомийки, хорижий аскарлар мамлакатни тарк этмас экан, жангу жадал давом этаверади. Афғон ҳукумати эса ҳозирда мамлакатда фақатгина афғон ҳарбийларини машқдан ўтказадиган хорижий қўмондонларгина қолганлигини айтишмоқа. Уларга кўра, Толибон билан кураш якунланиши билан улар ҳам қисқа бир вақт ичида мамлакатдан чиқиб кетишади.
