Трамп нефт нархини арзонлатгани учун Саудия Арабистонига миннатдорчилик билдирди
АҚШ президенти Дональд Трамп нефть нархини арзонлатгани учун Саудия Арабистонига миннатдорчилик билдирди. Трампнинг айтишича, Саудиянинг ҳаракатлари ортидан нефть нархи 82 доллардан 54 долларга тушган.
Саудия билан ҳамкорлик тўғрисда гапирар экан, Трамп 21 ноябр куни журналистларга:
“Мен учун Америка биринчи ўринда туради. Биз ҳарбий буюртмалар учун юз миллиард долларлардан бош тортмоқчи эмасмиз, агар Саудиядан бош тортсак бу Россия ва Хитой учун совға бўлади. Саудия Арабистони билан алоқаларни узсак, нефт нархи кескин ўсиб кетади. Мен уларни ушлаб турибман. Улар бизга нефтни арзон нархда ушлаб туришга кўмак бермоқда. Мен нефт янада арзон бўлишини истайман”, -деди Трамп.
Бундан олдинроқ АҚШ Конгресси журналист Жамол Қошиқчи ўлдирилиши ортидан Саудияга нисбатан кучлироқ жазо чоралари кўришни таклиф қилган эди. Бироқ Трамп Вашингтон етарлича жазо чоралари кўрганини айтиб, таклифни рад этган эди.
16 ноябр куни АҚШ журналист Жамол Қошиқчини ўлдиришда иштирок этганликда гумонланаётган 17 нафар саудияликка нисбатан иқтисодий санкциялар жорий этган эди. Уларнинг орасида валиаҳд шаҳзода Муҳаммад бин Салмоннинг бош ёрдамчилари Сауд ал Қаҳтаний ва Моҳир Мутриб ҳам бор. АҚШ Қахтаний Қошиқчининг ўлдириш режасига раҳбарлик қилганлардан бири бўлган, деб гумонламоқда.
Санкция жорий этилган шахсларнинг АҚШдаги бойликлари музлатилади ва АҚШ фуқароларига улар билан ҳамкорлик қилиш тақиқланади.
