Путин: АҚШ аралашмаса масала ҳал бўлмайди
Россия Президенти Владимир Путин Сочи шаҳрида Германия канслери Ангела Меркел билан учрашгандан сўнг муштарак матбуот анжумани ўтказди. Анжуманда Сурия масаласига тўхталган Путин Хон-Сайхундаги кимёвий ҳужумни уюштирганлар жазоланиши кераклигини билдирди. Бир қанча экспертлар бу қуролни Асад режими амалга оширганлигини даллиллар билан исботлаган бўлса ҳам, Путин текширув холис экспертлар тарафидан давом эттирилиши лозимлигини таъкидлади.
“Биз кимёвий қурол ишга солинганлигини қаттиқ қоралаймиз. Идлибда кимёвий қурол ишатганлар қўлга олиниши ва жазоланиши керак. Лекин бу пухта ва холис тергов билан амалга оширилиши лозим”, деди Россия раҳбари.
Россия президенти Сурия муаммосини ҳал қилиш учун ўт очишни тўхтатиш ва Суриядаги сиёсий кучлар билан алоқа ўрнатиш каби бир қанча уринишлар амалга оширилаётганлигини билдирар экан, бироқ бу борада (парда ортида турган) АҚШ аралашмаса, масала ҳал бўлмаслигига урғу берди.
“Авваламбор ўт очишни тўхтатиш битимини амалга ошириш керак. Остона музокараларининг бир қисми сифатида, Эрон ва Турк ҳамкорларимиз билан минтақада оташкесимни таъминлаш учун ҳаракат олиб боряпмиз. Бу иш Женева жараёни доирасида амалга ошади.”, “Албатта, Америка бўлмаса бу муаммони самарали тарзда ҳал қилиш мумкин эмас. Шунинг учун биз америкалик ҳамкорларимиз билан мулоқотни давом эттирмоқдамиз. Бу нозик соҳада босқичма-босқич иш олиб бориш керак”, деди Путин.
Шунингдек, Россиянинг бошқа мамлакатлар сиёсатига аралашмаслигини билдирган Путин бошқаларни Россия сиёсатига аралашаётганликда айблади.
“Биз ҳеч қачон бошқа мамлакатларнинг сиёсий ҳаётига ҳам, сиёсий жараёнига аралашмаймиз. Биз Россиянинг сиёсий ҳаётига ҳам ҳеч кимнинг аралашмаслигини истардик. Афсуски, бунга зид вазиятга гувоҳ бўлмоқдамиз. Кўп йиллар давомида Россиянинг ички сиёсий жараёнига аралашишга уриниб келишди”, деди у.
Путин Россиянинг бошқа мамлакатлар сиёсатига аралашмаслигини даъво қилар экан, Асад режимини қўллаб-қувватлаш учун рус армиясининг Сурияга кирганлиги ва Исломни талаб қилаётган Сурия халқининг бошидан тонналаб бомбалар ёғдирганлиги ва бу ҳолат ҳозир ҳам давом этаёганлиги ҳақида оғиз очмади.
