Россия Туркиядан яна нималар кутмоқда?

553
0

Россиянинг Анқарадаги элчиси Андрей Карлов агар Туркиянинг Россия билан муносабатларини бутунлай яхшилаш мақсади бўлса, уриб туширилган самолёт учун Анқара ҳукумати товон тўлаш кераклигини билдирди.

 “(Россия президенти) Владимир Владимирович (Путин) муносабатларни такомиллаштириш учун нима кутаётганимизни аниқ айтган эди: узр сўраш, жиноятчиларни жазолаш ва товон тўлаш. Биринчиси амалга ошди. Навбат иккинчи ва учинчисига келди”, деди Андрей Карлов Россиянинг Интерфакс ахборот агентлигига берган баёнотида.

Туркия бош вазири Бинали Йилдирим аввалроқ ТРТ ахборот агентлигига берган интервьюсида Россия ҳарбий самолётининг уриб туширилишига нисбатан керак бўлса, товон тўлаши мумкинлигини билдирган эди. Рус учувчисининг ўлимида айбдор деб топилган Алпарслон Челик ҳозирда суд қилинмоқда.

Айни пайтда Кремл Туркия Президенти Ражаб Тоййиб Эрдоғаннинг Россия президенти Владимир Путинга юборган “узр мактуби” ҳақида расмий хабар тарқатди. Хабарга кўра, Эрдоған мактубда Туркия ва Россия ўртасида узоқ вақтлардан буён давом этиб келган стратегик шериклик ва дўстна муносабатларга зарар етганидан чуқур ташвиш билдирган.

 “Биз ҳеч қачон Россия Федерациясига тегишли самолётнинг уриб туширилиши истагида бўлган эмасмиз. Бундай ниятимиз ҳам бўлган эмас”, “Биз ҳаётдан кўз юмган рус учувчисининг оиласини турк оиласи сифатида кўрамиз. Кўрилган зарарни қоплаш учун нима қилиш керак бўлса, биз бунга тайёрмиз. Бундан ташқари рус учувчисининг ўлимида айбдор деб топилган турк фуқароси устидан тергов жараёни бошланган”, дейилади мактубда.

Бироқ Россия СУ-24 қирувчи самолётининг турк ҳаво ҳудудини бузиб кириши сабабли уриб туширилиши ортидан баёнот берган Президент Эрдоған “Бунинг учун кимдир узр сўраш керак бўлса, у биз эмасмиз. Ҳаво ҳудудларимизни бузганлар узр сўрашлари шарт”, деган эди.

LEAVE A REPLY

Please enter your comment!
Please enter your name here