Украина бўйича Минск келишувлари қанчалик тезроқ бажарилса, Россияга қарши санкциялар шунчалик тезроқ бекор қилинади, деб айтди Россия президенти Владимир Путин билан музокаралардан кейин АҚШ Давлат котиби Жон Керри. Бу ҳақда РИА “Новости” ахборот агентлиги маълум қилди.
“Шуни таъкидлаб ўтмоқчиманки, Минск келишувлари бўйича мажбуриятларни амалга ошириш бўйича чоралар кўриш керак ва Украинадаги ихтилофни ҳал қилиш учун саъй-ҳаракатларни давом эттириш лозим. Минск келишуви қанчалик тез бажарилса, АҚШ ва Европа Иттифоқининг Россияга нисбатан киритган санкциялари шунчалик тез бекор қилинади”, деб айтди Керри.
Аввалроқ Керри Минск келишувларининг бажарилиши бўйича жавобгарлик Украинадаги ихтилофнинг барча томонлари зиммасида эканлигини айтган эди.
Россия ташқи ишлар вазири Сергей Лавров Путин ва Керри ўртасида бўлиб ўтган музокараларни аниқ ва мавзуга оид бўлди, деб айтди. Лавровнинг айтишича, учрашув чоғида Сурия масаласи бўйича олдинга силжиш асосий вазифа қилиб белгиланди.
Туркистон:
Путин 2015 йил якунида одатдаги матбуот баёноти вақтида журналистларнинг саволларига жавоб бераётиб, Асадни сақлаб қолиш принципи ҳақида гапириб ўтди. Унда Путин, Асадни ҳокимиятдан кетиши ёки қолишини фақат Сурия халқи ҳал қилади деди. У Керри билан шу масала тўғрисида маслаҳат олиб боришгани ва шу хулосада иккови якдил фикрда эканларига ишора қилди.
АҚШ Путиннинг шу кундаги ички ва ташқи сиёсий тутуриқсиз ҳолатидан, Суриядаги манфаатларини рўёбга чиқариб олишда унумли фойдаланиб олмоқчи. Путин эса, АҚШнинг илтифотидан умид қилиб, ҳеч бўлмаганда И. Каримовни оламий эмбаргога бораётган санкцияларидан сақлаб қолганидек, Россияни ҳам Путиннинг режимини ҳам сақлаб қолишидан умидвор.
Лекин Россия Ўзбекистон эмас. У ўзини тиклай бошлаши билан яна оламий гегемонлик сари ҳаракатланаверади. Путин эса, отдан тушса ҳам эгардан тушгани йўқ. У эгардан туша олмайди ҳам. Россия етакчи гуруҳи уни йўқ қилиб юбориши мумкин. Путин эндиги сиёсий умри мобайнида, уруш қилаверишга ҳаракат қилади. У АҚШ рухсат берган ва халқаро сиёсатда қўллаб туришни ваъда қилган барча имкониятдан фойдаланиб, урушларга киришаверади. Соддароқ айтганда Россия АҚШнинг ҳимоячи ити вазифасига ўзини таклиф қиляпти. Ички сиёсатида ҳам, фақат ҳарбийларга таянади, ҳозирги кетувида унинг бошқа имконияти йўқ.
Туркия Россия самолётини уриб тушурганида, Россия АҚШнинг яширинча берган ваъдасига ишониб аввал катта шов шув кўтариб юборди. Кейин эса, АҚШ НАТО орқали Туркияни қўллаб юборди. Путин ўта ноқулай аҳволда қолди. Туркия Россияга таҳдид қила бошлади. Россия эса, Туркиядан кириб келаётган помидорларни орқага қайтариш билан жавоб қайтарганга ўхшаган бир қатор ҳаракатлар билан бутун дунё олдида шарманда бўлди. Бунинг билан АҚШ Россияга ўз ўрнини кўрсатиб қўйди.
Энди Керри Путиндан, бўлиб ўтган ҳодисалардан қандай хулосалар чиқариб олганини текшириш учун ва баъзи бир матбуот тармоқлари айтишаётганидек “капитуляцияни қабул қилиб олиш учун келди”. Лекин Россия АҚШнинг фақат ифлос ишларини бажариб юрувчи ҳарбий машинаси бўлиб кун кўради. Асадни сақлаш мажбурияти эмас, Путин ўзи Асаднинг ўрнига тушиб бораётгани боис, ўзини сақлаш учун ҳаракатланиш деган янги программа қабул қилди. Путин Керри олдида шу мажбуриятни ўз зиммасига олиб, ўз режими ҳаётини АҚШнинг ихтиёрига топширади. Россия АҚШнинг мустамлакаси бўлиш томонга дастлабки яна бир қадам ташлади десак бўлаверади.
