Россиянинг кучли босими остида қолган Украина ҳукумати 2010 йилда Иттифоқларга қўшилмаслик мақомини қабул қилган эди. 2014 йилнинг 23 декабр куни Украина парламенти иттифоқларга қўшилмаслик мақомини бекор қилиш бўйича қонун лойиҳасиникўриб чиқди ва бу мақомни бекор қилишни ёқлаб 350 депутат овоз берган. Мазкур мақомни бекор қилиниши Украина ҳар қандай иттифоқ, хусусан, НАТОга аъзо бўлиб кириши учун йўл очилганини англатади.
“Бу давлатимизнинг ҳар қандай ҳарбий иттифоққа кириши мумкинлигини англатади. Бу бизни Европа ва НАТО маконига етаклайди”, – деди Украина Ташқи ишлар вазири Павел Кримкин.
Украина шарқидаги исёнчиларни Россия томонидан қўллаб-қуватланиши ортидан президент Пётр Порошенко Украинани НАТОга аъзо бўлиши учун курашишга ваъда берган эди.
2014 йил мартида Қримни аннексия қилган Россия Донецк ва Луганскдаги жангариларни қурол-яроғ билан таъминлаб келаётганини рад этиб келаётган бўлсада, Европа Иттифоқи ва Америка Қўшма Штатлари Россияга қарши жазо чоралари киритиб келмоқда.
Украина парламентининг сўнгги қарори борасида баёнот эълон қилган НАТО бу қарорни ҳурмат қилишини айтиб ўтди.
Ўз навбатида Россия Ташқи ишлар вазири Сергей Лавров, Олий Рада қарори тарангликни янада кучайтириши ҳақида огоҳлантирди.
“Бу контрпродуктив, фақат қарама-қаршиликни кучайтиради, бундай қонунларни қабул қилиш билан Украина давлати ичидаги чуқур инқирозни ҳал этиш мумкин, деган иллюзияни пайдо қилади”, – деди Сергей Лавров.
