“KTK” телеканалининг хабар қилишича, Олмаотанинг эскибозор ҳудудида навбатдаги ер можароси авж олган. Бу сафар янги магистрал йўли қурилиши туфайли уйлари бузилиши керак бўлган “Улжон” кичик тумани аҳолиси норозилик билдирмоқда.
Уйлари бузилиши режалаштирилган аҳолига бошқа жойдан ер таклиф қилинган, бироқ буни адолатсизлик деб баҳолаган аҳоли таклифни рад қилган.
Қурилаётган магистрал йўлида “Улжон” кичик тумани аҳолисига тегишли ва бузилиши режалаштирилган 30 дан ортиқ уйлар жойлашган. Туман аҳолисининг айтишича, яқин кунларгача уларни ҳеч ким безовта қилмаган, бироқ эндиликда ҳокимият расмийлари ҳар куни таҳдид билан уйни бўшатиб қўйишни талаб қилишмоқда.
“Бизга 3 июлгача чиқиб кетишимизни айтишди. Бизга чўлдан ер таклиф қилишди. У ерда ҳеч қандай шароит бўлмаса биз қандай яшаймиз”, – дейди мазкур туманда истиқомат қилувчи Гулмира Кебекбаева.
Уйи бузилиши керак бўлган аҳолига ҳокимият “Қорасув” кичик туманидан ер таклиф қилган. Бироқ, бу таклиф кўпчиликка ёқмаган. Одамларнинг сўзларига кўра, у ерда сув ва электр йўқ. Эътиборли жиҳати уйи бузилаётган одамларнинг аксарияти ўз уйларини расмийлаштириб ҳам улгуришмаган. Натижада қонунга мувофиқ уларга уйи бузилганлиги учун компенсация ҳам тўланмаслиги керак. Шу сабабли ҳам улар ҳокимият расмийларини айблашмоқда. Одамларнинг сўзларига кўра, ҳокимиятдан одамлар келиб уларнинг уй ҳужжатларини расмийлаштириш учун олиб кетишган, лекин бу иш амалга ошмаган.
“Шу кунгача биз кутаётгандик. Агар кутмаганимизда эди, ўзимиз аллақачон ҳужжатларни расмийлаштирган бўлар эдик. Энди эса уларга ишониб аҳмоқ бўлиб қолдик”, – дейди Олмаотада яшовчи Жанил Айтуарова.
Кейинги ҳафта уйларни бузиш учун кичик туманга бульдозер келиши ҳақидаги гап-сўзлар одамлар орасида ваҳима уйғотган ва одамлар норозилик билдириш учун ҳокимиятга қараб йўл олишган.
