Британия бош вазири Дэвид Кэмерон Туркиянинг яқин йилларда Европа Иттифоқи ҳамжамиятига аъзо бўлиб кириш имконияти йўқлигини таъкидлади. Камероннинг изоҳлашича, ҳозирги ҳолатни ҳисобга олганда Туркиянинг Европа Иттифоқига аъзолиги 3000 йилдан сўнг рўёбга чиқиши мумкин.
“Туркиянинг Европа Иттифоқига аъзо бўлиши эҳтимолдан анча йироқ. Шу кетишида бўлса, ҳатто “эҳтимоли”ни белгилаш учун ҳам ўнлаб йиллар ўтади”, “Улар 1987 йилда мурожаат қилишган эди. Бугунги илгарилашига қараганда, уларнинг Европа Иттифоқига кириши сўнгги тахминларга кўра, эҳтимол бу 3000 йилга тўғри келиши мумкин”, деди Британия бош вазири Дэвид Кэмерон.
“ITV” телевидениеси тарафидан ташкил қилинган теледастурга иштирок этган Кэмерон Британиянинг Европа Иттифоқидан ажраб чиқиши учун кампания олиб бораётганларга нисбатан қарши фикр билдирди. Кэмеронга кўра, уларнинг Британия халқига қарата “Биз Туркиянинг Европа Иттифоқига аъзо бўлишига тўсқинлик қила олмаймиз. Шу сабабли бизнинг Европа Иттифоқидан чиқишимиз учун овоз беринг”, деган чақириғи воқеликни акс эттира олмайди. Шунингдек Камерон барча Европа Иттифоқига аъзо давлатлар қаторида Англиянинг ҳам Европа Иттифоқига аъзо бўлишга интилган ҳар қандай давлатга нисбатан вето қўйиш ҳуқуқи борлигини айтиб ўтди.
Туркия НАТО иттифоқининг аъзосидир. 1996 йилдан буён Европа Иттифоқи билан бир қаторда, божхона иттифоқига аъзо давлатлардан бири ҳисобланади. 1987 йилдан буён Европа Иттифоқига аъзо бўлиш ишқида ёнган бу давлат, 1999 йилда номзод мақомини қўлга киритган. Келишувга кўра, Туркия ЕИга аъзо бўлиши учун унинг 72та талабини бажариши шарт.
