Қирғизистон давлат меҳмонхоналарида казино очишни таклиф қилинди
Қирғизистон иқтисодиёт ва савдо вазирлиги давлат меҳмонхоналарида казино ва бошқа қимор ўйинларини очишга рухсат беришни таклиф қилди. Тегишли қонун лойиҳаси Жогорку Кенешга тақдим қилинди.
Амалдаги қонун давлат муассасаларида казино ёки букмекерлик (пул тикиш) ўйинларини киритишни тақиқлайди. Мамлакатда учта казино ва тўртта букмекерлик контораси фаолиятига рухсат берилган.
Эслатиб ўтамиз, Қирғизистонда казино фаолиятига 2012 йилнинг 1 январида жорий қилинган таъқиқ 2022 йилда бекор қилинган эди. Президент Садир Жапаров халқнинг кескин қаршилигига қарамай, 2022 йил 30 июн куни казино очишга рухсат берувчи қонунни имзолади.
Аслида казино каби қиморхоналар капиталистик тузумда ҳокимиятдаги одамларнинг оқонуний йўллар билан қўлга киритган пулларини ювиш воситаси сифатида ишлатилади. Бу бутун дунёдаги казиноларнинг асосий даромад манбаидир. Казинолар бу каби ифлос ишларни бажариб бериш билан гуллаб-яшнамоқда. Шу боис, қиморхоналар коррупцияни ривожлантиришда давлат амалдорлари учун жуда муҳим тармоқ ҳисобланади.
Энг муҳими, қимор Аллоҳ Таоло ҳаром қилган амаллардан биридир. Аллоҳ Таоло “Моида” сурасида шундай марҳамат қилади:
يَاأَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ
“Эй мўминлар, ароқ (маст қиладиган ичкилик ичиш), қимор (ўйнаш), бутлар (яъни уларга сиғиниш) ва чўплар (яъни чўплар билан фолбинлик қилиш) шайтон амалидан бўлган ҳаром ишдир. Бас, нажот топишингиз учун уларнинг хар биридан узоқ бўлингиз!” (Моида: 90).
Бинобарин, ҳар бир мусулмон бирор ишга киришишдан аввал унинг шаръий ҳукмини билиши вожибдир. Аммо ҳукумат расмийлари айтаётган “фойдалар” эса қиморни ҳаромликдан чиқара олмайди. Шундай экан, биз мусулмонлар ҳукуматнинг жамиятни бузувчи, шариатга зид бўлган барча ҳаракатларига қарши туришимиз лозим. Расулуллоҳ соллаллоҳу алайҳи васаллам шундай дедилар:
إنَّ اللهَ لا يُعذِّبُ العامَّةَ بعمَلِ الخاصَّةِ، حتى يرَوُا المُنكَرَ بينَ ظَهْرانَيْهم، وهم قادِرونَ على أنْ يُنكِروه، فلا يُنكِروه، فإذا فَعَلوا ذلك عذَّبَ اللهُ الخاصَّةَ والعامَّةَ
“Албатта, Аллоҳ Таоло айрим одамлар қилган жиноят сабабли ҳаммани жазоламайди. Аммо қачонки ўша омма кўз ўнгларида мункар (бузғунчилик, адолатсизлик) қилинаётганини кўрсалар-у, уни инкор қилишга (йўлини тўсишга) қодир бўла туриб инкор қилмасалар, у ҳолда Аллоҳ Таоло ўша жиноятчиларни ҳам, (уларни лоқайд томоша қилиб турган) оммани ҳам баробар азоблайди”.
Нурдин Асаналиев
