ШҲТ, МДҲ ва КХШТ мамлакатлари илк марта ҳамкорликда ҳарбий машғулотлар ўтказади
ШҲТ, МДҲ ва КХШТ мамлакатлари мудофаа вазирлари терроризмга қарши кураш бўйича ҳамкорликни кенгайтириш борасида келишиб олдилар – “Кавказ-2020” машғулотлари доирасида илк марта ҳамкорликда ҳарбий машғулотлар ўтказилади, деб маълум қилди Россия мудофаа вазири Сергей Шойгу.
“Сентябрь охирида “Кавказ-2020” стратегик қўмондонлик-штаб машғулотларида терроризмга қарши кураш бўйича ҳамкорликдаги вазифалар таклиф қилинди”, – деди у ШҲТ, МДҲ ва КХШТ мамлакатлари мудофаа вазирлари йиғилиши якунида.
Шойгунинг сўзларига кўра, мудофаа вазирлари терроризм ва экстремизмга қарши курашни устувор вазифа деб эълон қилишган.
Ҳозирча дастлабки ўқув машғулотлари қандай шаклда ўтказилишига аниқлик киритилмаган.
Изоҳ: Белорусда содир бўлаётган воқеалар расмий Москвани шошилинч чоралар кўришга ундаган кўринади. Белорусда бўлиб ўтган навбатдаги президентлик сайловидан бошланиб кетган норозилик намойишларидан АҚШ ва Европа давлатлари ўз манфаатлари йўлида фойдаланиб қолиш учун жиддий киришишганини Россия ўзига нисбатан таҳдид сифатида қабул қиляпти. Бундан ташқари, Литвага АҚШ ҳарбийлари ҳамда зирҳли оғир техникаси етиб келиб, Беларус билан чегара яқинидаги генерал Сильвестрас Жукаускас номли полигонда ҳамкорликда машғулот ўтказиши ҳам унинг ташвишига қўшимча бўлди. Шу сабабли ҳам Россия шу вақтга қадар ўтказилмаган ҳарбий машғулотларини шошилинч ўтказишга ҳаракат қилмоқда. Агар Россия фақат КХШТга аъзо давлатлар билангина ҳарбий машғулот ўтказадиган бўлса, у ўзини мустамлакаси сифатида кўришга одатланиб қолган бошқа давлатлар четда қолиб кетади. Чунки, КХШТга Арманистон, Белорус, Қозоғистон, Қирғизистон ва Тожикистонгина аъзо холос.
Шанхай Ҳамкорлик Ташкилоти (ШҲТ) эса Хитой билан бирга Россия, Қозоғистон, Тожикистон, Қирғизистон ҳамда Ўзбекистон давлатларини ўзида жамлаган. Россиянинг собиқ мустамлакаларин ўз чангалида ушлаб қолиш учун ташкил этилган ва ўн давлатни – Россия, Озорбайжон, Арманистон, Булорус, Қозоғистон, Қирғизистон, Молдавия, Тожикистон, Туркманистон ва Ўзбекистонни жамлаган Мустақил Давлатлар Ҳамдўстлиги ташкилотининг эса на сиёсий ва на иқтисодий жиҳатдан таъсири бор. У кўпроқ рамзий ҳамкорликни ифода қилади. Энди Россия бу ташкилотдан ҳам ҳарбий мақсадлари йўлида фойдаланишга ҳаракат қилиб кўрмоқчи бўляпти. Россия учун ушбу давлатларни ўз назорати остида ушлаб туришнинг ягона йўли сифатида фақат ҳарбий қувватга суянишдан иборат. Унинг учун бошқа йўл йўқ. Ҳарбий таъсири сақлаб қолиш ҳамда ҳарбий қувватининг намоён этиш учун эса “терроризм ва экстремизм” “таҳдиди” энг ишончили ва синовлардан ўтган воситадир.
Абдураҳмон Одилов
