Трамп Мусулмонларга яна нафратини сочди
Испанияда юз берган террор ҳужумлари ортидан АҚШ президенти Доналд Трамп ижтимоий тармоқлар орқали берган баёнотида Мусулмонларга нафратини сочди. Унинг Мусулмонлардан нафратланиши ўз оғизидан ошкор бўлди, дилидаги адовати эса янада каттароқдир.
Трамп 13 кишининг ҳаётига зомин бўлган Барселона ҳужуми ҳақида ёзар экан, АҚШ Генерали Жозеф Першинг биринчи жаҳон урушида Филиппинда асирга тушган Мусулмон жангчиларни бир жойга тўплаб, тўнғиз қонига ботирилган ўқ билан отиб ташлаганлигини намуна қилиб келтирди.
“АҚШ Генерали Першинг террорчиларни қўлга олган пайтда нима қилганлигини бир эсланг. Шундан сўнг 25 йил бўйича радикал Исломий терроризм қайта юзага келмади”, деди Трамп.
Бундан аввал Трамп 2016 йилдаги сайловолди кампанияси давомида ҳам Мусулмонларга нисбатан худди шу ҳодисани, яъни мусулмон жангчиларнинг тўнғиз қонига ботирилган ўқ билан омматан отиб ташланишини терроризмга қарши самарали кураш услуби сифатида намуна қилиб келтирган эди.
“Генерал Першинг 50 дона ўқ олиб уларни тўнғизнинг қонига ботирди. Сўнг бу ўқларни аскарларининг қуролларига жойлаб, деворга тизиб қўйилган 50 нафар террорчилардан 49 нафарини отиб ташлади. Одамларга бу воқеани айтиб берсин, дея фақат биттасини тирик қолдирди. Шундан сўнг 25 йил давомида ҳеч қандай муаммо юзага келмади”, деган эди Трамп 2016 йил 19 феврал куни Жанубий Каролинадаги сайловолди компаниясида.
АҚШ президенти тивиттер ижтимоий тармоғи орқали ўша мисолни яна намуна сифатида келтирди. У АҚШ генерали Першингнинг Филиппиндаги мусулмон жангчиларга қўллаган услубини янгидан татбиқ қилиш ҳақида сўз очар экан, Ислом душманлиги ва ирқчилик Ғарбда асосий маданий муаммога айланганлигини таъкидлади.
