Евроиттифоқ Марказий Осиё бўйича янги стратегия ишлаб чиқади
2018 йилнинг 23 ноябр куни Ўзбекистон ташқи ишлар вазири Абдулазиз Комилов бошчилигидаги делегация Брюссел шаҳрида бўлиб ўтган “Марказий Осиё – Европа иттифоқи” минтақалараро вазирлар учрашувида иштирок этди. Бу ҳақда Ўзбекистон ТИВ хабар бермоқда.
Қирғизистон, Қозоғистон, Тожикистон, Туркманистон, Ўзбекистон ва Евроиттифоқ ташқи сиёсат идоралари раҳбарлари томонидан сиёсий, иқтисодий, инвестицион соҳалардаги, барқарор ривожланиш, иқлим ўзгариши, атроф-муҳит, сув манбалари ва хавфсизлик жабҳаларидаги ҳамкорликнинг ҳозирги ҳолати ва истиқболларини батафсил муҳокама қилинди.
Марказий Осиё давлатлари вакиллари 2019 йил сўнгига қадар Марказий Осиё бўйича янги стратегияни ишлаб чиқиш ва қабул қилиш борасидаги ЕИнинг қарорини қўллаб-қувватладилар ҳамда унинг самарадорлигини ошириш бўйича аниқ таклифлар бердилар.
Ялпи мажлислар ва бошқа шаклдаги учрашувлар чоғида минтақавий ва халқаро сиёсат масалалари юзасидан фикр алмашилди.