Саудия Арабистони раҳнамолигида 34 Исломий давлат аскарлари иштирокида ўтказилган ҳарбий машғулотдан сўнг пойтахт Риёзда ўзаро қўшинларни мувофиқлаштириш маркази ташкил этилиши ҳақида эълон қилинди. Ўтган март ойида Саудия Арабистонининг ташаббуси билан ўттиз тўртта Исломий ўлкалар армияси муштарак ҳарбий машғулот ўтказган эди. Бугунга келиб, улар ўртасида муштарак мувофиқлаштириш маркази орқали ҳамкорликни кенгайтириш лойиҳаси тузилмоқда.
Хорижий ахборот агентликларининг хабарига кўра, қўшма мувофиқлаштириш марказини ташкил этиш шу Рамазон ойида амалга оширилиши кутилмоқда. Саудия Арабистони расмийлари тарафидан мувофиқлаштириш марказига доир берилган баёнотда билдирилишича, мувофиқлаштириш марказини ташкил қилиш учун тайёргарлик аллақачон бошлаб юборилган.
“Кейинги қадам ҳарбий коалицияга аъзо давлатлар мудофаа вазирларининг учрашуви бўлади. Бу учрашув Рамазон ойида бўлиб ўтиши ҳам мумкин. Айни пайтда Ар-Риёд шаҳрида коалиция марказини ташкил этиш учун тайёргарликлар олиб боряпмиз. Мувофиқлаштириш марказида ҳар бир аъзо давлатнинг ҳарбий масъуллари вакил сифатида иштирок этишади. Ҳарбий коалицияга аъзо давлатлар бу марказдан “жангарилар” фаолиятига қарши ёрдам талаб қилишлари мумкин”, дейилади баёнотда.
Эслатиб ўтиш жоизки, Саудия Арабистони ўтган йилнинг 15 декабри куни “терроризм”га қарши курашувчи 34та мусулмон давлатидан иборат ҳарбий коалиция ташкил қилинганини эълон қилган эди. Бунинг ортидан АҚШ мудофаа вазирлиги мазкур 72 соат ичида тузилган коалицияни қутлаб чиқиб, унинг келажагига умид билдирган эди.
