Қирғизистон бош вазири Темир Сариев “Биринчи радио” билан қилган жонли мулоқотида, иттифоққа қўшилишни фойдалари салбий жиҳатларидан устун бўлганини айтиб ўтди.
“ЕОИИга қўшилиш тарихий қарор бўлган. Агар кирмаганимизда вазият 2-3 баробар мураккаб бўлар эди. Гап шундаки, бизнинг асосий бозоримиз Қозоғистон ва Россиядир”, – деди Сариев.
Унинг сўзларига кўра, асосий ҳамкорлар айрим қийинчиликларни бошдан кечиришмоқда, аммо вақт ўтиши билан буни енгиб ўтишади.
Бош вазирнинг қайд этишича, “Ўзимизни иттифоққа аъзо бўлмаган қўшнилар билан таққослаб кўришимиз мумкин. Нефт ва газ бўлишига қарамай, миллий валютаси қадрсизланиб бормоқда, бизники эса қувватини сақлаб турипти”.
Туркистон:
Қирғизистон ҳукумат халқнинг хоҳиш истагига зид равишда мамлакатни ЕОИИга олиб кирганидан сўнг вужудга келган вазият, халқ бошидан ўтказаётган иқтисодий қийинчиликларни хаспўшлаш йўлини қидиришмоқда. Темир Сариев бу ишда ўзини айбдор қилиб қўйишлари мумкинлигини билгани сабабли ҳам бу иттифоқ келтирган “фойдалар”ни бўрттириб кўрсатига интилмоқда. Аслида эса вазият ниҳоятда мураккаблигича қолмоқда ва “асосий ҳамкорларда” вужудга келган вазият бир неча йилларсиз изга тушмаслиги маълум.
Божхона хизмати маълумотларига кўра, 2014 йилда Қирғизистон Қозоғистонга умумий қиймати 340 миллион доллардан зиёд товар экспорт қилган бўлса, иттифоққа аъзо бўлган 2015 йилда 150 миллион долларлик товар сотган холос. Икки давлат ўртасидаги умумий савдо ҳажми 2015 йилда 472 миллион долларни ташкил этган ва бу кўрсаткич 2014 йилга нисбатан икки баробарга озайиб кетди. Россия билан бўлган савдо айланмаси ҳам мақтанарли даражада эмас.
