Қирғизистон президенти Алмазбек Атамбаев 18-20 июн кунлари Санкт-Петербург шаҳрида бўлиб ўтган халқаро иқтисодий форумда иштирок этди ва мазкур сафари доирасида Россия президенти Владимир Путин билан яна бир бор учрашиб қайтди.
Россия президенти билан бўлган учрашув вақтида Атамбаев Қирғизистон 1 июлдан бошлаб Евроосиё иқтисодий иттифоқининг тўлақонли аъзоси бўлишига умид билдирди.
Ўз навбатида Путин Қирғизистон Россиянинг Марказий Осиёдаги муҳим иттифоқчиси эканини айтиб ўтди.
“Ҳойнаҳой, Қирғизистон Россиянинг Марказий Осиёдаги муҳим ҳамкори ва иттифоқчичи экани ҳақида гапиришга ҳожат бўлмаса керак”, – дея таъкидлаб ўтди Путин.
Унинг сўзларига кўра, ҳозир Россия ва Қирғизистон Евроосиё иқтисодий иттифоқига аъзолик билан боғлиқ муҳим қарор қабул қилиш арафасида турибди.
“Биз ўз томонимиздан барча расмий процедураларнинг энг яқин вақт ичида ниҳоясига етказилиши учун қўлимиздан келганини қиламиз. Ўйлайманки, Қирғизистон ҳам шундай қилади”, – деган Путин.
Бунга жавобан Президент Атамбаев Қирғизистон Россиянинг минтақадаги нафақат энг муҳим, балки “энг ишончли” ҳамкори ҳам эканини таъкидлаган.
“Россия бизнинг энг муҳим, энг яқин стратегик ҳамкоримиздир”, – деди Атамбаев.
Атамбаевнинг сўзларига кўра, Қирғизистон 1 июлдан бошлаб Овросиё Иқтисодий Иттифоқининг тўлақонли аъзоси бўлишга ҳозирлик кўрмоқда.
