Қирим парламенти расман Украинадан ажралиб чиққанлигини эълон қилар экан, бунинг ортидан Россия федерациясига қўшилишни сўраб Кремлга мурожаат қилди. Қирим парламентининг бу қарори якшанба куни ўтган умумхалқ референдумидан сўнг эълон қилинди. Чунки Қирим расмийларига кўра, Референдумда иштирок этган фуқароларнинг 97% Россияга қўшилишни ёқлаб овоз берганлар. Россия ҳам референдум натижаларини қабул қилишини эълон қилди. Қирим олий кенгаши Россия рублини расмий миллий валюта деб эълон қилди. Бу ишлар ортидан Россия президенти Владимир Путин 18 март куни Қримни Россияга қўшиб олиш ҳақидаги шартномани имзолади. Путиннинг фикрича, Қирим кучли давлат таркибида қолиши керак, акс ҳолда у ҳамма нарсасини йўқотади.
Ҳали Россиядан бошқа бирорта мамлакат, жумладан Украина ҳукумати ҳам референдум қонунийлигини эътироф этган эмас. Қирим аҳолисининг 12%ини ташкил қилган қиримтатарлари ва украин миллатига мансуб Қрим фуқаролари Россияга қўшилишдан норози. Қиримтатарлар мажлиси референдумни байкот қилишга чақирмоқда.
Қўшма Штатлар Қиримнинг Россияга қўшилишига қарши. Оқ уй сўзчиси Жай Карни АҚШ Қирим умумхалқ референдуми натижаларини рад этишини билдирди.
“Биз Украинанинг Қирим минтақасида ўтказилган референдумни рад этамиз. Бу референдум Украина конституциясига зиддир. Куч билан таҳдид қилиш ва халқаро қонунларни бузиш маъносидаги Россиянинг ҳарбий аралашуви остида ўтказилган бу референдум натижаларини халқаро ҳамжамият тан олмайди. Украина ҳукуматининг аралашувисиз Украина келажагига доир қарор қабул қилиниши мумкин эмас. Бошқа бир тарафдан қараладиган бўлса, бундай референдумга зарурат йўқ.”, деди Оқ уй сўзчиси.
Европа иттифоқи ҳам бир овоздан Россиянинг бу ишига қарши. Европа иттифоқи Россия ва Қиримнинг 21 нафарига жазо чораларини эълон қилди. Қора рўйхатга тушган амалдорларнинг Ғарб давлатларига саёҳати чекланиши ва банкдаги ҳисоб рақамлари музлатилиши кўзда тутилган. Буюк Британия ҳукумати Россия билан барча ҳарбий ҳамкорлик алоқаларини тўхтатишини маълум қилди. Британия Ташқи ишлар вазири Уилям Хейгга кўра, бу чоралар сўнггиси эмас, улар вазиятга қараб
кенгайиши мумкин.
