Жээнбеков Қирғизистоннинг сиёсий элитаси нимага амал қилиши кераклигини маълум қилди
“Қирғизистоннинг сиёсий элитаси бир-бирини ҳурмат қилишни, бошқалар фикрига қулоқ тутишни ўрганиши лозим. Улар ўзаро ҳамкорлик қила олсалар, мамлакатда тинчлик, бирдамлик ва ривожланиш ўрнатилади”, – деди Сооронбай Жээнбеков Жогорку Кенешнинг собиқ спикерлари ва собиқ бош вазирлар билан учрашувда.
Унинг айтишича, учрашувдан асосий мақсад ягона майдонда мамлакатни ривожлантириш масалаларини муҳокама қилишдан иборатдир.
Қирғизистон президентининг таъкидлашича, келгусида ташқи ва ички сиёсатда кўплаб синовлар кутилмоқда.
“Сиз мамлакат учун ҳал қилувчи вақтларда муҳим қарорларни қабул қилишда иштирок этгансиз. Сиёсий воқеалар марказида бўлгансиз. Кўплаб соҳаларда бой тажрибага эгасиз. Бу бой захира талаб этилмай қолиши керакмас”,- деб таъкидлаб ўтган Жээнбеков.
“Элита мамлакатни ривожлантириш бўйича бир фикрга келган давлат ҳар доим муваффақиятларга эришган. Улар баҳслашишган, бир-бирларини танқид қилишган. Бироқ иш асосий йўналишга келганда, улар ягона фикрга келганлар. Ҳозир Қирғизистонда давлатнинг барча ижтимоий-сиёсий кучлари иштирокида ҳал қилиш лозим бўлган кўплаб масалалар ва муаммолар мавжуд. Мен сиз бу бирлаштирувчи кучга айлана олишингизга ишонаман”,- деди Жээнбеков.
Жээнбеков фуқаролик жамияти, сиёсий кучлар ва давлат бошқаруви органлари ўртасидаги ҳамкорликни илгари суриши ва мулоқотни қўллаб-қувватлаши, маъносиз можароларсиз танқидни эшитишга тайёрлигини қўшимча қилган.
Туркистон:
Ваниҳоят Президент Жээнбеков сиёсий элитага мурожаат қилишга мажбур бўлди. Бир йилги фаолияти мобайнида деярли ҳеч қандай реформа ёки иқтисодий ва сиёсий ўзгаришлар қила олмаган президент, йиллик ҳисобот топшириш вақти келганида ўз салоҳиятини элита вакиллари билан бўлишмоқчи бўлгандек тактикани қўлламоқда. Атамбаев ва унинг тарафдорлари, президентнинг йиллик ҳисоботини талаб қилиб қурултой уюштиришяпти. Халқ олдида ёлғон популистик ҳисобот бериш жараёни Жээнбековни қўрқитиб юборди. Атамбаевнинг шу кунларда сиёсатга қайтиб, мухолифот етакчиси сифатида кириб келганини эълон қилгани бу қўрқувни ваҳимага айлантирди.
Жээнбеков бир йил мобайнида Қирғизистон сиёсий элита вакилларидан холи бўлган ўз сиёсатини юргизмоқчи бўлди. Аммо у, йил бўйи бирор кўзга ташланарли иш кўрсата олгани йўқ. Атрофида майда, кўзга кўринмаган, танилмаган лекин итоаткор сиёсатчилар йиғилиб қолди. Ёдингизда бўлса Атамбаев ҳам, эски элита вакилларини сиёсатдан четлатиб, худди шу йўлдан юрган эди. Кеча президент элита вакиллари ва аввалда бош ваъзир вазифасида иш юритган сиёсатчиларни йиғиб, уларни ўзи билан бирга фаолият олиб боришга чақирди. Демак, Жээнбеков Қирғиз сиёсий элитаси Атамбаев томонга ўтиб кетишидан хавотирга туша бошлади. Яъни улар Атамбаев томонга ўтиб кетмаса ҳам, вазиятга тўғри баҳо бериш билан жамиятни жумбушга келтириб юборишлари мумкин.
Айлана стол атрофидаги музокарада Адахан Мадумаров ва яна бир қатор сиёсатчилар янги ҳокимият олиб бораётган сиёсий йўналишни очиқ муҳосаба остига олишди. Ҳа, бу сиёсатчилар сиёсатда ўз ўринларига эга бўлиб, улар билан президент ҳозирдагидек эркин фаолият олиб бора олмайди. Президентнинг оилавий бошқарув системасини давом эттириши ҳам осон кечмайди. Шунга қарамай, кеч бўлса ҳам президент улардан ёрдам сўрашга мажбур бўлди.
Атамбаев билан Жээнбеков ўрталаридаги кескинликка тўхтатиладиган бўлсак, уларнинг бир бирларига қарши курашишлари, худди ўзи ўзига қарши курашаётган кимсани акс эттиради. Улар аввалда ҳар бир жиноятларини бирга амалга оширишган ёки камида ўша жиноятдан хабардор бўлган ҳолда сукут қилиш билан рози бўлиб туришган. Энди ўша жиноятларда бири иккинчисини айблаётиб, ўзини покламоқчи бўлаяпти. Бу эса жиноятни тан олиб, лекин вазиятдан ўзини поклаб олиб чиқиб кетиш мақсадида фикр юритилаётганини очиқ кўрсатиб турипти. Демак иш жиноятга қарши фаолият асосида олиб борилаётгани йўқ. Балки ўз жиноятларини шеригига юклаб юбориш, жамиятни бир бирига қарши йўналтириш йўлида бир томон шаллақилик қилса, иккинчи томон қўлидаги салтанатни суистимол қилишга ҳаракат қиляпти. Бузуқ элита вакиллари эса, ким томондан ўзларига қандай фойда келиши мумкинлигини ҳисоб китоб қилиб туришибди!
