Путин: Кучли бўлишга ҳаққимиз бор
Россия президенти Владимир Путин Россия парламенти йиғилишининг очилиш мажлисида сўзлаган нутқида давлат расмийларини “кучли Россия”ни барпо қилишга чақирди. Путиннинг таъкидлашича, ҳар бир давлатнинг кучи унинг сақланиб қолишининг асосий шарти ҳисобланади.
“Россиянинг кучли бўлиши давлатимизнинг яхлитлигини ва юртимизда яшаётган барча халқларни ўз ичига олган Россиянинг мавжудлигини сақлаб қолишнинг энг муҳим ва асосий шарти эканлигини ҳар доим ёдда тутишимиз керак”, деди Россия президенти.
Путин ўз нутқида 1906-1911 йилларда Рус империясини бошқарган Пётр Столыпиннинг бир аср муқаддам давлат мулозимлари қошида “Биз Россиянинг тарихий олий ҳуқуқини қўллаб-қувватлашимиз учун кучларимизни бирлаштиришимиз ва саъй-ҳаракатларимиз, мажбуриятларимиз ва ҳуқуқларимизни мувофиқлаштиришимиз лозим. Бу бизнинг кучли бўлишдаги ҳуқуқимиздир”, деган сўзларидан иқтибос келтирди.
“Биз бу сўзларни ёдга олиб, янгидан тус берган пайтимизда ҳар доим “ҳар қандай халқ ва ҳар қандай давлат кучли бўлиш ҳуқуқига эга”, деган фикрга келамиз. Аммо шуни айтиб ўтишимиз лозимки, биз бу сўзлар билан супер давлатларнинг ғурурига боғлиқ маънони қасд этмаяпмиз. Бировга бир нарса демаймиз ва бундай қилиш ниятимиз ҳам йўқ”, дея қўшимча қилди Россия президенти.
Путин мамлакатда хавфсизлик ва мудофаа қобилиятини мустаҳкамлаш, халқаро майдонда ўз мавқеини ҳимоя қилиш зарурлигини таъкидлади. У парламент ва барча номзодлар уюшмаси бу сиёсий саъй-ҳаракатларни қўллаб-қувватлаш учун ўз ҳиссасини қўшишига умид билдирди.
“Россиянинг кучи халқимиз, анъаналаримиз, маданиятимиз, иқтисодиётимиз, кенг тупроқларимиз, улкан табиий бойликларимиз, ва албатта мудофаа қобилиятимиз зимнида ётади. Лекин энг муҳими шуки, бизнинг кучимиз халқимизнинг бирлигидан келиб чиқади”, деди Путин.
Шунингдек, Путин халқаро конструктив муносабатларни ривожлантириш учун парламент дипломатияси имкониятларидан фойдаланишга чақирди. Иқтисодий ривожланиш бўйича, рақобатга, инвестиция оқимларига, замонавий технологияларга тўсқинлик қиладиган қонуний чекловларни бекор қилиш зарурлигини ҳам таъкидлаб ўтди.
