Қирғизистон ва Россия ҳарбий ҳамкорликни мустаҳкамлайди
Хабар: Қирғизистон ва Россия “ҳарбий ва ҳарбий техник”, жумладан, Қирғизистон ҳудудидаги Россиянинг ҳарбий базаси доирасида “ҳамкорликни кенгайтириш” иши давом эттирилишини билдиришди. Бу ҳақда икки давлатнинг президентлари Садир Жапаров билан Владимир Путиннинг учрашуви натижаси бўйича биргаликдаги баёнотда айтилди.
“Қирғизистон суверенитетини ҳимоя қилиш ва хавфсизлигини таъминлаш, халқаро террористик ташкилотларнинг эҳтимолий қуролли ҳужум актларига қарши туриш кераклигини таъкидлаш билан бирга давлат раҳбарлари Қирғизистон қуролли кучларини мустаҳкамлаш ва унинг ҳудудидаги рус ҳарбий объектларни ривожлантириш муҳимлигига эътибор қаратишади”, – дейилади билдирувда.
Изоҳ: Шу йилнинг апрелида Россия кутилмаганда ўзининг Қирғизистон ва Тожикистондаги ҳарбий базаларининг жанговар тайёргарлигини оширишга қарор қилди. Россия мудофаа вазири Сергей Шойгу 28-апрел куни Нью-Деҳлида ШҲТга аъзо давлатлар мудофаа вазирлари йиғилишида бу қарорни: “АҚШ ва унинг иттифоқчилари терроризмга қарши курашда ёрдам бериш баҳонасида Марказий Осиёда ўз ҳарбий мавжудлигини тиклашга ҳаракат қилмоқда. Биз минтақа давлатларига ҳарбий инфратузилмани жойлаштириш бўйича сўровларни ШҲТ маконида барқарорликка бевосита таҳдид сифатида баҳолаймиз”, дея изоҳлади.
Аввалроқ, 15-апрелда Қирғизистон ва Россия қўшма минтақавий ҳаво мудофааси тизимини ташкил этиш тўғрисида хабар тарқалди. Россия ҳукумати сайтида эълон қилинган хабарда айтилишича, ягона ҳаво мудофааси тизимини яратиш бўйича келишув тасдиқлаш учун президент Владимир Путинга тақдим этилган. Қирғизистон ва Россия биргаликда ҳаво мудофаа тизимини яратиш ҳақидаги келишувни 2022 йил 16 августда имзолаган эди. Шундан сўнг Россия президенти тегишли тузилмаларга Қирғизистон томони билан музокараларни бошлаш бўйича топшириқ берган. Келишув кучга кирса, унинг муддати давомида Қирғизистон Россияга ҳаво мудофааси тизимига ажратилган қўшинларини жойлаштириш учун 5 гектар ер участкасини текинга бериши маълум бўлди.
2021-йилда айни шундай келишув Тожикистон томонидан ратификация қилинган эди.
Россия минтақада сиёсий жиҳатдан АҚШга имкониятни бой бериб бораётган бўлса, иқтисодий жиҳатдан Хитой рус ўрнини эгаллаб бормоқда. Шу сабабли Россия минтақани ўзининг ҳарбий ҳимоясига мухтож ҳолатга олиб келишга ҳаракат қилади. Бунинг учун энг ишончли усул “экстремизм ва терроризм”га қаршу кураш ва афғон ваҳимасини янада бўрттириб кўрсатишдан иборат. Путин режими минтақада ҳарбий иштирокини кучайтириш учун сунъий хавфлар ёки атайин беқарорлик келтириб чиқариш йўлида турли провокация ва терактлар уюштириши ҳам мумкин. Шу сабабли биз мусулмонлар бу каби фитналардан огоҳ бўлишимиз, халқаро ва минтақавий сиёсий вазиятлардан воқиф бўлиб, мустамлакачи кофирларнинг устимиздан ўйин қилишларига йўл қўймаслигимиз зарур.
Абдураҳмон Одилов