بِسْمِ اللهِ الرَّحْمٰنِ الرَّحِيمِ
Ҳизб ут-Таҳрир – Тунис вилоятининг юрт аҳлига мурожаати
Шанба куни пойтахт Тунис кўчаларида минглаб тунисликлар намойишга чиқишди. Қўзғолон хотираси билан ўтказилган ушбу митингларда президент Қайс Саид сиёсатига қарши шиддатли юришлар ўтказилди. Ҳабиб Бурқиба кўчасида «Халқ режимни ағдаришни истайди» ҳамда президентга қарата «кет!», деб ҳайқириб, юриш ўтказдилар.
Ўз навбатида, Ҳизб ут-Таҳрир – Тунис вилояти матбуот баёноти чиқариб, Тунис аҳлига мурожаат йўллади. Унда қуйидаги сўзлар келган:
«Эй Тунис аҳли! Демократия сабабли ҳаётингиз хонавайрон бўлганини ҳамда юртингиз жамиятда пул ва нуфуз билан ҳукмронлик қилаётган кучларга томорқа бўлиб қолганини ўзингиз кўрдингиз. Барча сиёсий доира хоин бўлиб, мустамлакачи Ғарб ҳукуматларига қарам бўлишга шошилаётганларига ўзингиз гувоҳсиз…».
Мурожаатда яна қўшимча қилинди:
«Сиз тоғут золимларга қарши кўтарилган қўзғолонда Ислом Умматининг биринчи сафида эдингиз, тоғут Ибн Алини қувиб солишга муваффақ бўлдингиз. Шундай бўла туриб, наҳотки сизга заифлар ва малайлар етакчилик қилишларига рози бўлсангиз. Ахир, қўзғолонингизни тўғри йўлидан адаштирган ва юртни яна хорлик ва қарамликка қайтарган мана шулар-ку?! Наҳотки, кофирларга хизматкор бўлишга розисиз, ахир, сиз Аллоҳ Ислом билан сийлаган мусулмонларсиз-ку?! Ҳа, сиз мужоҳид фотиҳларнинг мусулмон авлодисиз, бас, нега бу илмоний кимсанинг бебошлигига сукут қиляпсиз?! Бу президентдан ёки мухолафатдан ёхуд Меҳнат уюшмасидан ўзаро миллий, деган иддао билан мулоқот ўтказишларини кутяпсизми, ахир, улар тобелик қилиш ва юртни кофирга гаров қилиб топширишдан бошқа нарсани билишмайди-ку?! Ёки яна сайловлардан умид қиляпсизми?! Ўтган сайловларнинг барчасидан сўнг ҳеч қандай ўзгариш бўлмаганини, аксинча, улар мустамлакачилик тизимини янада мустаҳкамлаганини кўрмадингизми?!».
Баёнот сўнггида бундай дейилди:
«То Пайғамбарингиз Aнинг минҳожлари асосида сиёсат юритувчи давлат барпо бўлиши орқали Аллоҳнинг дини қоим бўлмас экан, сиз ўзингизни бу дунёда ҳам, охиратда ҳам қутқаролмайсиз?! Ушбу давлат барпо бўлажак кунга эса, мақсадлар тўғри бўлса, кўз очиб юмишдан ҳам яқин вақт қолди. Зеро, биз билан тўлиқ озодлик ўртасида, худди 2011 йилда эгаллаганингиздек, эгаллаш лозим бўлган кескин позиция бор, холос. Ўша позицияни қайта эгалласангиз, албатта ҳар бир малайни қувиб соласиз, илмоний ва капиталистик тузумларни ағдарасиз ва инсон ўйлаб топган фикрларни йўқ қиласиз, Исломдан бошқа ҳеч қандай альтернативага рози бўлмайсиз.
Роя газетасининг 2022 йил 18 январ чоршанба кунги 426-сонидан
