Жапаров Путиндан телефон орқали сўзлашишни илтимос қилди
10 ноябр куни Россия раислигида Шанхай ҳамкорлик ташкилотига аъзо давлатлар раҳбарлари кенгашининг мажлиси видеоанжуман шаклида ўтказилди. Ушбу йиғилишда сўз олган Қирғизистон президенти вазифасини бажарувчи, бош вазир Садир Жапаров Россия президентига юзланиб, Евроосиё интеграцияси масаласида Қирғизистон ҳар доим Россия учун ишончили шерик бўлиб қолишини айтди.
“Биз икки мамлакат ўртасидаги иқтисодий ва маданий алоқаларни изчил ривожлантиришни давом эттирамиз. Ҳамкорлик соҳасида бир қатор долзарб масалалар мавжуд. Сиздан буларни телефон орқали муҳокама қилишни илтимос қиламан”, – деди Жапаров.
Изоҳ: Расмий Кремл Қирғизистонда содир бўлган навбатдаги давлат тўнтаришини ортиқча хиссиёт ва баёнотларсиз хотиржамлик билан қарши олди. Чунки давлат тўнтаришидан сўнг ҳокимият тепасига ким келишидан қатъий назар фақат ўзи билан ҳисблашишга ва унинг рози қилиш йўлида ҳаракат қилишига ишончи комил эди. Бироқ, навбатдаги давлат тўнтаришида ғарбпараст кучлар муҳим рол ўйнагани ва давлат тўнтариши ўзининг розилигисиз амалга ошгани сабабли рус ҳукумати қирғиз ҳукуматини жазолашга қарор қилди. Шу сабабли ҳам давлат тўнтаришидан кейин “сиёсий вазият изга тушиши” баҳонаси билан Қирғизистонга ажратилиши кутилган 100 миллион долларлик ёрдамни номаълум муддатга тўхтатиб қўйди ва қирғиз расмийларига совуқ муносабат (ўзини катта олиш) сиёсатини қўллай бошлади. Октябр ойининг охирида Москвага хизмат сафари билан борган собиқ ташқи ишлар вазири, айни дамда Жапаровнинг ташқи ишлар бўйича маслаҳатчиси лавозимида ишлаётган Чингиз Айдарбековни Москвада ҳеч ким кутиб олмади.
“24.kg” хабар агентлиги бош муҳаррири Асел Оторбаева ўз Facebook саҳифасида Айдарбеков Россия ташқи ишлар вазири Сергей Лавров, Россия ҳукумати аъзолари ҳамда Россия Давлат Думаси етакчилари билан “Кремлда учрашув ўтказишгани истаган” кунда уларнинг “ҳар биридан рад жавобини олгани” ҳақида ёзди.
Бундай муносабат Садир Жапаровни хавотирга солиб қўйгани аниқ. Шу сабабли ҳам Жапаров қандай йўл билан бўлмасин Путиннинг кўнглини олиш, уни рози қилиш йўлини изламоқда. Сабаби, Россия розилигисиз ўзини президент бўла олмаслигини жуда яхши билади. Шунинг учун имкон бўлган вақтда Путинга тилёғламалик қилиб ҳеч бўлмаганда телефон орқали музокара ўтказишни илтимос қилмоқда. “Мустақилликни” даъво қилаётган Қирғизистон расмийларининг ҳақиқий аҳволи шундан иборат.
Абдураҳмон Одилов
