Атамбаев “эски сиёсий доира”га қарши намойишда иштирок этишини маълум қилди
3 июль куни Бишкекда собиқ президент Алмазбек Атамбаев тарафдорлари томонидан тинч намойиш уюштирилиши кутилмоқда. Атамбаев Қўй-тошдаги уйидан туриб, ўз тарафдорларига, намойишда иштирок этишини билдирди.
Атамбаев тарафдорлари намойишда, “эски сиёсий доира кетсин, ўрнига янги халқ вакиллари келсин” деган маънодаги плакатлар билан чиқишмоқчи. Намойиш мавжуд президент Сооранбай Жээнбековга қарши руҳда ўтиши кутилмоқда.
Изоҳ:
Атамбаев билан Жээнбеков ўртасидаги кескинликлар ҳозирда сиёсий қатламни иккига бўлиб, кейинги босқичда мамлакат фуқороларини ҳам иккига бўлишга қараб кетмоқда.
Атамбаев Қўй-тошдаги хон саройида юзлаган одамларнинг ортига яшириниб олди. Жиянбеков қўлига ўтган салоҳиятидан фойдаланиб, қонун билан Атамбаевни бурчакка тақаб боряпти. Ҳар икки томон бир-бирига қарши матбуот кураши олиб бориш орқали фуқоролар фикрини ўз мақсадлари томон йўналтирмоқчи бўлишмоқди. Улар талашаётган сиёсий доира вакиллари бўлган сиёсатчилар ҳам, фақат шахсий манфаатлар илинжида, икки томонга бўлиниб боришяпти.
Атамбаев ҳокимият учун хатарли қувватга айланиб кетиши мумкин эди. Чунки Жээнбеков тортиб олган етакчи гуруҳ Атамбаевнинг гуруҳи эди. Аммо улар Жээнбеков ортидан юриб, ўз хожаларини сотиб кетишди. Улар “сиёсий доира” деб атаётган бу гуруҳ, ҳар қандай янги қувват пайдо бўлса, ўша томонга мойиллаша оладиган ишончсиз гуруҳ эканлиги сабабли, Жээнбеков мухолифатга айланиб бораётган Атамбаев гуруҳини парчалаб, ўзини қамоққа ташламоқчи бўлаяпти.
Ҳар икки тараф мақсадига етиш ёки жиноий жавобгарликдан қутулиб қолиш учун фуқоролардан фойдаланишмоқчи. Атамбаев Жээнбековни муросага чақириб, ўзини жиноий жавобгарликдан сақлаб қолиш мақсадида мамлакатда миллий, ҳудудий ёки бошқа кескинликлар пайдо қилишдан ҳам тоймайди. Атамбаев 6 йил қонун асоси бўлган конституциянинг ҳимоячиси бўлди. Шу кунларда унинг ўзи қонунни бузиб, президентни ва ўзи тузган суд механизмини тан олмаслигини айтди. Демак у мамлакатда бетайинлик ҳолатларини келтириб чиқариш орқали муаммолар пайдо қилиш йўли билан Жээнбековни муросага мажбурламоқчи бўлади.
Мана шулардан кўриниб турибдики, хиёнат ва заифлик асосига қурилган ва шахсий манфаатлари учун тинмай бир-бирини сотиб бораётган бу етакчи гуруҳни, яъни сиёсий доирани ҳимоя қилишдан ҳеч қандай манфаат йўқ. Ҳар икки томон биз фуқороларнинг қувватидан фойдаланиб, ўзларининг шахсий манфаатларини рўёбга чиқариб олмоқчи бўлишяпти. Бунинг оқибатида фуқоролараро кескинлик ва парокандаликлар келиб чиқиши мумкин бўлган хавф-хатарлар уларни қизиқтирмайди.
Биродарлар, улар бераётган арзимас садақалари эвазига уларнинг шахсий манфаатлари учун халқ манфаатларини гаровга солмайлик. Аввалги давлат ағдарилишларини эсга олайлик. Халқ вакиллари қурбон берилди, лекин етакчи гуруҳ ҳокимиятга эришгач, уни яна ўзлаштириб олаверди! Кейин ундан яна бошқасига ҳокимиятни олиб бермоқчи бўлганимизда ҳар сафар халққа қарши қурол билан чиқишмадими?! Энди ўшалар яна халқни бир-бирига қарши тўқнашувга ундамоқчи бўлишаяпти….
Абдураззоқ Мўъмин
