АҚШ сенати Туркияга ультматум қўйди
Туркия ё Россияни ё Ғарб мамлакатларини танлаши керак, деди АҚШ сенатининг қуролли кучлар қўмитаси раҳбари Жеймс Инхоф. Бу ҳақида РИА “Новости” хабар қилмоқда.
“Агар Туркия F-35 дастури ичида қолишни истаса, у Россиядан С-400 тизимларини олишдан воз кечиши керак”, – деди Инхоф Пентагоннинг Конгресс учун тайёрланган ҳисоботига изоҳ бераркан.
Инхофнинг айтишича, Туркия АҚШнинг НАТО бўйича жуда муҳим ҳамкоридир. Шу сабаб у ўз мақомига мувофиқ ҳаракат қилиши керак. “Туркия ё Россияни ё Ғарбни танлаши керак. Агар Туркия С-400 сотиб олишда давом этса – уни салбий оқибатлар кутмоқда”- деди сенатор.
Нашр шунингдек, АҚШ ва НАТО Туркиянинг С-400 сотиб олишидан нега бунчалки ташвишга тушганини ҳам айтиб ўтган. Ҳарбий эксперт Стивен Залогининг фикрига кўра, Туркияга С-400 билан бирга россиялик ҳарбий мутахассислар ҳам келишади ва улар С-400ни американинг F-35 самолётига қарши синаб кўриш имконига эга бўлиши мумкин.
“Россиялик ҳарбий мутахассислар С-400 радарларини Туркиянинг F-35 самолётларига қарши синаб кўриши мумкин. Бу америка қирувчи самолётининг антирадар хусусиятларини йўққа чиқариши мумкин”, – дейди эксперт.
Маълумки, Туркия ва Россия 2017 йилнинг декабр ойида умумий қиймати 2,5 миллиард доллар бўлган тўртта ЗРК С-400 дивизиони етказиб бериш борасида битим имзолаган эди. Шартномага кўра, мажмуанинг биринчи партияси 2019 йилнинг октябр ойида етказиб берилиши керак.
