АҚШ: Сурия жанги бизнинг стратегиямизга мос амалга ошмоқда
АҚШ бош штаб бошқармасининг матбуот котиби генерал-лейтенант Кеннет Маккензи АҚШ бошчилигида Сурияга уюштирилган ҳужумдан, у ерда стратегик ўзгариш ясаш кўзда тутилмаганлигини билдирди. Генерал-лейтенантнинг таъкидлашича, Сурия майдонидаги ўзгаришлар АҚШнинг стратегиясига мувофиқ амалга ошмоқда.
Шунингдек Маккензи АҚШнинг минтақадаги ҳарбий унсурлари ҳеч қачон Россиянинг таҳдидига дуч келмаганлигини ҳам қайд этди. “АҚШ бошчилигидаги ҳужум Сурия майдонида нимани ўзгартирди”, деган саволга “Бу ҳужумлар Сурия жангида стратегик ўзгариш ясаш учун амалга оширилди деб ўйламайман”, деб жавоб берди Маккензи.
Туркистон:
Сурияда АҚШнинг истаги амалга ошаётганлиги ҳамда сўнгги ҳарбий амалиётлар Сурияда стратегик ўзгаришлар ясаш учун эмаслиги ҳақидаги баёнотлар шуни кўрсатадики, Сурия майдонида рол ўйнаётган давлатлар АҚШнинг режасига мувофиқ ҳаракат олиб боришмоқда.
Бироқ режимга қарашли баъзи ҳарбий нуқталарнинг ҳужумга тутилиши эса, АҚШ томонидан рол берилган Россиянинг ўзбошимча ҳаракатларига жавобан, унга яхшилаб ҳаддини билдириб қўйиш ва у ерда кимнинг гапи ўтишини такрор эслатиб қўйишдан иборатдир. Чунки Россиянинг ҳарбий аралашуви туфайли Суриядаги мувозанат режим фойдасига ҳал бўла бошлагач, гўёки Россия ўзини ғолибдек ҳис қилиб, Америкасиз ўзбошимчалик билан иш юрита бошлади. Сурия масаласини ҳал қилиш учун Путиннинг Сочида конференция ташкил қилиши шулар жумласидан. Чунки у Сочи конференцияси орқали Сурияда ўзига тобе мухолифат яратмоқчи бўлди.
Аммо Американинг мақсади Сурия ечимини ўз манфаатига мувофиқ тартибга солишдир. АҚШ Сурияда ўзи танлаган ечимдан бошқасига асло йўл қўймайди. Ҳатто у Россиянинг Сурия ечимида ўзига шерик бўлишига ҳам рози бўлмайди. Шундай экан, у русларнинг танобини тортиб қўйиши табиийдир.
