Трамп: Булар сизлар учун арзимас сариқ чақалардир
АҚШ президенти Доналд Трамп Саудия Арабистони валиаҳди Муҳаммад бин Салмон билан учрашуви чоғида Вашингтон ва Риёд ўртасидаги муносабатлар ҳар доимгидан ҳам яхшироқ давом этаётганлигини билдирди. Унинг таъкидлашича, терроризмга (Исломга) қарши курашда Саудия Арабистони муҳим рол ўйнамоқда. Шунингдек, Трампга кўра, Саудияда улкан бойлик захираси мавжуд, Қўшма штатлари эса ундан унумли фойдаланиши мумкин.
“… бизнинг ҳозирги муносабатларимиз ҳар доимгидан ҳам яхшироқдир, менимча, бу янада яхши бўлади. Биз Америка Қўшма Штатларида инвестиция ётқизиш режаларини белгилаш орқали икки томонлама муносабатларни яхшилашга интиламиз. Мамлакатимизда ётқизилаётган улкан сармоялар ишчиларимиз учун иш ва халқимиз учун жуда кўп иш ўринлари яратиш маъносини англатади”, деди Трамп.
“Биз мудофаа ҳолатини ҳам муҳокама қилдик. Бутун Яқин Шарқ учун мудофаа тизимини яратмоқдамиз. Минтақада нима содир бўлаётганини биз жуда яхши биламиз. У ерда кўплаб ўзгаришлар мавжуд”, дея қўшимча қилди у.
АҚШ президенти сўзи давомида Саудия бойлигига кўз тикканлигини ва уни қўлга киритиш умиди борлигини яширмади.
“Саудия Арабистони жуда бой мамлакатдир. Умид қиламанки, Қўшма Штатлар ушбу бойликларнинг айримларини кўлга киритади. Бу АҚШда иш ўринлари яратиш ва ҳарбий техникаларни сотиб олиш шаклида амалга ошади”, деди у.
Трамп кемалардан тортиб ракета мудофаасигача, ҳарбий транспорт воситаларидан тортиб жанговар самолётларгача Саудия харид қлаётган АҚШ ҳарбий техникасининг жадваллари ва нархларини эълон қилди. Миллиард-миллиард долларлар Трамп оғзининг бир бурчагидан чиқар экан, Шахзодага “булар сизлар учун арзимас сариқ чақалардир, кўпайтириш керак”, дея киноя қилди.
Саудия Арабистони валиаҳди Муҳаммад бин Салмон эса АҚШ ва Саудия Арабистони ўртасидаги муносабатлар эски ва тарихий эканини таъкидлади. Валиаҳдга кўра ўтган йили Қўшма Штатлар ва Саудия Арабистони ўртасида режалаштирилган ҳамкорлик кутилган режадан ортиб, Саудиянинг АҚШда ётқизган инвестициялари ҳажми икки баробарга етган.
“Биз Яқин Шарқдаги Американинг энг қадимги иттифоқдошимиз. 80 йилдан кўпроқ вақтдан буён ўртамизда муштарак улкан манфаатлар мавжуд. Сиёсий, иқтисодий ва хавфсизлик жиҳатдан АҚШ билан биргамиз. Муносабатларимизнинг асоси ҳақиқатан ҳам улкан ва чуқурдир”, “Ўзингизга маълум, жаноб Президент, сиз президент бўлган кундан эътиборан, келгуси тўрт йил ичида 200 миллиард долларлик сармоя ётқизишни режалаштирган эдик, лекин ҳозирнинг ўзида бу сармоялар 400 миллиард доллар билан давом этмоқда.”, деди Муҳаммад Бин Салмон.
