Саудия муфтийси: (Исроил)га қарши жанг қилиш жоиз эмас
Саудия Арабистони муфтийси ва уламолар кенгаши раиси Шайх Абдулазиз ибн Абдуллоҳ Оли Шайх кутилмаган фатво чиқарди. Унинг бу фатвоси (Исроил) томонидан юқори баҳоланди. Саудия муфтисининг фатвосига кўра, Исроил халқига, яъни яҳудийларга қарши жанг қилиш жоиз эмас.
Маҳаллий телевизион канали орқали чиқиш қилган Саудия муфтийси Абдулазиз Оли Шайх томошабинларнинг “ўтган июл ойида Масжид ул-Ақсода рўй берган воқеалар” ҳақидаги саволларга жавоб берар экан, “(Исроил) халқига қарши жанг қилиш жоиз эмаслиги, Ҳамаснинг террорчи ташкилот эканлиги ва Ҳизбуллоҳга қарши (Исроил) қўшинлари билан ҳамкорлик қилиш мумкинлиги ҳақида фатво берди.
Бу фатводан боши осмонга етган (Исроил) алоқа вазири Аюб Кара Саудия Арабистони муфтийси ва уламолар кенгаши раиси Абдулазиз Оли Шайхни табриклаб, уни (Исроил)га таклиф қилди.
Асли дурузлардан келиб чиққан Аюб Қора Твиттер ижтимоий тармоғидаги ўзининг расмий саҳифаси орқали қуйидаги хабарни тарқатди: “Яҳудийларга қарши жанг қилишни ва уларни ўлдиришни таъқиқлаган фатволари туфайли Саудия Арабистони муфтийси ва уламолари кенгаши раиси Шайх Абдул Азиз Оли Шайхни табриклайман. Оли Шайх Ҳамаснинг террорчи ташкилот эканлигини ва Фаластин халқига зарар етказганлигини, Ақсода ўтказилган намойишлар халқнинг туйғуларини қўзғаб, мафтункор сўзлар билан одамларни ўзига оғдириш эканлигини ва Ҳизбуллоҳни йўқ қилиш учун (Исроил) армияси билан ҳамкорлик қилиш мумкинлигини бидирди. Мен муфтийни (Исроил)га таклиф қилмоқчиман, юқори даражада ҳурмат билан кутиб олинади”.
