Москвада “Таблиғ” жамоатининг 69 нафар аъзоси ҳибсга олинди
Москвада фаолият юритаётган “Таблиғ” жамоатининг 69 нафар аъзоси Россия федерал хавфсизлик хизмати (ФСБ) тарафидан ҳибсга олинди. Бу ҳақида хавфсизлик хизмати ахборот маркази томонидан берилган баёнот орқали эълон қилинди.
“Россия федерал хавфсизлик хизмати ва Россия Ички ишлар вазирлиги ҳамкорлигида Москва вилоятида “терроризм” ва “экстримизм”га қарши қўшма амалиёт ўтказилди. Амалиётда асосий эътибор Россияда тақиқланган “Жамоати Таблиғ” экстремистик ташкилоти томонидан амалга оширилаётган махфий ва ноқонуний фаолиятни ҳал этишга қаратилди”, дейилади Россия федерал хавфсизлик хизмати Ахборот маркази томонидан берилган баёнотда.
Баёнотга кўра, жамоа раҳбарлари ва аксар аъзолари Ўрта Осиё фуқароларидир. Шунингдек уларнинг сафига қўшилиб фаолият юритаётган Россия фуқаролари ҳам бор. Ҳозирда бу борада жиноий иш қўзғатилганлигини билдирган Россия розведкаси, ҳибсга олинганларнинг кимлиги ва уларга нисбатан қандай жазо чораси қўлланиши ҳақида маълумот бермади.
Шунингдек баёнотда айтилишича, қўшма амалиёт давомида “экстремистик” адабиётлар ва коммуникация воситалари ҳамда жамоанинг “ноқонуний” фаолияти тўғрисидаги ҳисоботларни ўз ичига олган электрон ахборот ташувчи мосламалар (флешкалар) мусодара қилинган.
“Таблиғ” жамоатининг фаолияти Россиянинг ҳудудий яхлитлигига ва Россияда этник ва мазҳаблараро барқарорликка таҳдид солишини рўкач қилиниб, 2009 йилда Россия Олий суди томонидан террористик гуруҳ деб топилган.
Таъкидлаш жоизки, мазкур жамоа Ўзбекистон, Қозоғистон ва Тожикистон каби бир қатор мамлакатларда ҳам тақиқланган.
