Назарбоев чегарадаги муаммоларни бартараф этиш бўйича фармойиш бермаган
Қозоғистон бош вазири матбуот хизмати Бишкек томонидан тарқатилган “президент Назарбаев чегарада пайдо бўлган барча муаммоларни бартараф этиш тўғрисидаги фармойиши”ни инкор қилди. Қозоғистон бош вазири сайтида 12 октябр куни кечқурун эълон қилинган баёнотда таъкидланишича, “аслида ҳукуматга мазкур масала бўйича ҳукуматлараро маслаҳатлашув ўтказиш топширилди”.
Қозоғистон бош вазири матбуот хизмати баёнотида қайд қилинишича, Сочида бўлиб ўтган Евроосиё Иқтисодий Олий Кенгаши мажлиси доирасида Қозоғистон президенти ва Қирғизистон бош вазири ўртасида мулоқот бўлиб ўтмаган.
“Исақовнинг давлатимиз раҳбари олдига қисқа ташрифи бўлди”,- дейилади Қозоғистон бош вазири матбуот хизмати тарқатган баёнотда.
Нурсултон Назарбаев 11 октябр куни Россиянинг Сочи шаҳрида бўлиб ўтган расмий учрашувларда, жумладан МДҲ давлат раҳбарлари Кенгаши мажлисида иштирок этди. Қирғизистон номидан Сочига бош вазир Сапар Исаков бошчилигидаги делегация йўл олди. Ўша куни Қирғизистон расмий матбуоти Сапар Исаков Назарбоев билпан учрашгани ва уни қирғиз-қозоқ чегарасида юзага келган вазият борасида огоҳлантиргани ҳақида хабар тарқатилди.
“Музокоралардан сўнг президент Нурсултон Назарбаев Қозоғистон ҳукуматига чегарада юзага келган масалаларни бартараф этишга кўрсатма берди”,- дейилган эди Исаковнинг Facebook’даги саҳифасида 11 октябр кечқурун эълон қилинган хабарда.
Қозоғистон бош вазири матбуот хизмати баёнотида Қирғизистон бош вазири Сапар Исаковнинг Facebookдаги саҳифасида президент Назарбоев билан “қирғиз-қозоқ давлат чегарасидаги вазият борасида”ги суҳбат борасидаги “ахборот талқин қилинишида чалкашликлар” борлигини маълум қилди.
