Шавкат Мирзиёев кейинги ҳафтада Қирғизистонга бориши кутилмоқда
Ўзбекистон президенти Шавкат Мирзиёев сентябр ойи бошида Қирғизистонга ташриф буюради. Бу ҳақда Қирғизистондаги маҳаллий нашрлар мамлакат президенти Алмазбек Атамбаевга асосланиб хабар беришмоқда.
Қирғизистон президенти Алмазбек Атамбаев Ўш вилоятида халқ вакиллари билан учрашувда кейинги ҳафтада Ўзбекистон президенти ташрифи кутилаётгани ҳақида маълум қилган.
“Яқинда мамлакатимизга Ўзбекистон бош вазири келганди. Бу Ўзбекистон бош вазири 26 йил ичида илк бор мамлакатимизга келиши бўлганди”, – дея эслатиб ўтган Атамбаев.
Шуниндек Атамбаев чегараларни делимитация ва демаркация қилиш бўйича ишлар давом эттирилаётганини қўшимча қилган
“Ўзбекистон ва Тожикистон билан чегарадаги участкаларнинг 84 фоизида бу борадаги ишлар якунланиб, масалалар ҳал этилди”, – деган Атамбаев.
Маълумки, ўтган ҳафтада Бишкекда бўлиб ўтган икки давлат бош вазирлари учрашувида Сооронбай Жээнбеков президент Алмазбек Атамбаев сентябр ойида Ўзбекистонга ташриф буюришни режалаштиргани ҳақида маълум қилган эди. Кейинроқ Шавкат Мирзиёев ҳам Қирғизистонга ташриф буюриши ҳақида хабар берилди.
Туркистон:
Ўзбекистон ҳукумати Қирғизистонда юз бераётган президент алмашуви ортидан кутилаётган жараёнларга этиборсиз эмас албатта. Лекин асосий эътиборли жойи унинг бу жараёнда тутган сиёсий позициясидир.
Ўзбекистон авваламбор Қирғизистонда сиёсий хотиржамликни ушлаб қолишдан манфаатдор. Чунки Мирзиёевнинг Ўзбек элитаси ичида олиб бораётган ички сиёсати ва мустабид тузумдан қолган режимга қарши олиб бораётган сиёсий реформалари учун, қўшни давлатларидаги хавфсизлик ва хотиржамлик ҳолати ўта муҳимдир. Негаки Ўзбекистондаги Каримов шакллантирган бошқарув тизими ҳар бир тармоқни фақат хавфсизлик системаси асосига боғлаган ҳолда шакллантирилган. Шундан келиб чиқиб, Ўзбекистоннинг бошқарув тизгини деярли Инаятов бошчилигидаги хавфсизлик хизмати таъсири остига ўтиб қолган дейиш мумкин. Шунга кўра, мамлакат ичкарисида ҳамда минтақада рўй берадиган ҳар қандай хавфли вазиятлар фақат Мирзияев курашаётган хавфсизлик тизими учун қўл келади ва унинг таъсир қувватини янада кучайтиради.
Қирғизистондаги вазият эса, мухолиф кучлар канчалик кучли ва элита вакилларининг кўпчилигини ўз томонига оғдириб олишганига қарамай, уларнинг аксарият қисми Россиянинг қўлловидан умидвор бўлиб туришибди. Чунки Ғарб системасининг Қирғизистонга эътибори жуда кам ва таъсир қуввати ҳам ўта зайифдир.
Россия эса, ҳозиргача Атамбаев ўзига ўринбосар деб илгари суриб келаётган Сооронбай Жээнбековни қўллашга ваъда бериб келяпти. Шунинг учун Ўзбекистон ҳам ҳотиржам позиция сифатида Россия билан парралел юришни ихтиёр қилди. Чунки минтақалардаги ҳар қандай инқилобий ёки бошқа халқ тўпалонларининг барчаси фақат икки лагерга бўлинган халқаро кучларнинг манфаат талашуви ортидан юзага келадиган курашларнинг касофатидан бошланади. Ўзбекистон эса, халқаро сиёсатга таъсир ўтказа оладиган давлатлар сафига кирмайди. Шунинг учун у Россиянинг ихтиёрига тескари боришда ҳеч қандай манфаат топа олмаслигини жуда яхши билади.
Бу сафар Ғарб кучларинининг Қирғизистон ички сиёсатидаги кескин позицияси деярли кўринмаяпти. Буни, Текебаевнинг 8 йилга қамалиши билан инсон ҳуқуқлари ва фуқаролик ҳуқуқлари оёғ ости қилинаётган бир пайтда Ғарб машинасининг асосий қуроли бўлган “инсон ҳақ ҳуқуқ ҳимоячилар”ининг деярли иштироки кўринмаганидан билиб олиш мумкин. Демак майдонда фақат Россиянинг манфаати қолди.
Қирғиз президенти тахтдан кетиши олдидан Шавкат Мирзиёевнинг Қирғизистонга келиши, у Атамбаев командасини тахтда қолдириш тарафдори эканлигига далолат қилади. Чунки унинг бу ташрифидан ислоҳий тадбирлар кутиш мумкин эмас. Негаки сайлов якуни нима билан тугаши аниқ эмас. Лекин Атамбаевнинг президентликдан кетиши аниқ. Демак Мирзиёев Қирғиз элитасига Атамбаев қолдирмоқчи бўлаётган сиёсий гуруҳри (режим)ни қўллаётганига ишора қилиб, уни обрўйини кучайтириб қўймоқчи холос.
