Путин: Туркиянинг Суриядаги ролини қадрлаймиз
Россия Президенти Владимир Путин Кремлда ташкил қилинган маросимда Туркиянинг Москвадаги янги элчиси Ҳусайн Дириўзнинг ишонч мактубини қабул қилди.
Маросимда сўзга чиққан президент Путин Сурияда амалга оширилган ўт очишни тўхтатиш битимига тўхталар экан, Россия-Туркия алоқаларининг кундан кунга ривожланиб бораётганига урғу берди.
“Туркия билан муносабатларимиз ишончли тарзда изига тушиб бормоқда. Туркия президенти Ражаб Тоййиб Эрдоған билан 10 март куни жуда хайрли ва муваффақиятли учрашувни амалга оширдик. Бу учрашувда “Турк Аккую” каби йирик энергетик лойиҳаларни амалга ошириш масаласи алоҳида муҳокама қилинди”, деди Владимир Путин.
Путин маърузасида Туркиянинг Сурия масаласида кўрсатган хизматларини олқишлади. Унинг маълум қилишича, Россия-Туркия ҳамкорликда Сурия масаласига сиёсий ечим топиш ва терроризмга қарши кураш борасида янги-янги лоиҳалар тузиш ҳамда келажакда яна нималар қила олиши хусусида иш олиб бормоқда.
“Россия ва Туркиянинг ёрдами билан Асад кучлари ва қуролли мухолифат ўртасидаги ўзаро жангни тўхтатишга муваффақ бўлдик. Биз бу борада Туркия ўйнаган ролни биламиз ва қадрлаймиз. Бу ишлар Сурия масаласида музокараларни ташкил қилишга ёрдам берди”, деди Путин маросимда қилган маърузасида.
