Сурия мухолифати вакиллари Остонага келмади
Сурияда ўт очишни тўхтатишга кафил бўлган Россия, Туркия ва Эрон давлатлари ҳамда Сурия режимининг делегацияси Остона музокараларида иштирок этмоқда. Бироқ Сурия мухолифати вакиллари бу учрашувга келмади. Улар ўт очишни тўхтатиш ҳақида қарор қабул қилинганига қарамай, бомбардимон давом этаётганлигига норозилик сифатида Остона учрашувини бойкот қилишгани айтилмоқда.
Россия Ташқи ишлар вазири Сергей Лавров Остона учрашувига иштирок этмаган қуролли мухолифат қўмондонлари билан Россия мудофаа вазирлиги ўртасида алоқа мавжудлигини билдирди. Лавровга кўра, мухолифат вакиллари учрашувга иштирок этмаслиги ҳақида келтираётган сабаблар арзугулик сабаб эмас. Мухолифатнинг Остона учрашувини бойкот қилиш қарори кутилмаган ҳол бўлганлигини таъкидлаган Лавров бу вазиятни ҳал қилиш учун ҳаракат қилишини билдирди.
Кремл матбуот котиби Дмитрий Песков эса мухолифатнинг учрашувга иштирок этмаганлиги ҳақидаги саволларга “аввал бошиданоқ (Сурия тинчлик музокаралари) жуда мураккаб эканлигини билар эдик”, деб жавоб берди. Песков бу масала бўйича суриштирув ишлари давом этишини қўшимча қилди.
Сурия режимининг Остонадаги вакили Башар ал-Жаъфари мухолифат вакилларига кафил бўлган Туркияни ўз вазифасини адо қилмаётганликда айблади.
“Уч кафил давлатдан бири ўз вазифасини адо қилмаяпти. Мен бу ерда Туркияни назарда тутяпман. Бу қуролли гуруҳларнинг иштирок этмаслигидан Туркия жавобгардир”, деди Жаъфари.
Жаъфари Сурия режимининг делегацияси Остонага қуролли мухолифат билан учрашиш учун эмас, балки ўзининг иттифоқчилари бўлмиш Россия ва Эрон билан учрашиш ва ўзларининг бу масалага жиддий қараётганлигини намойиш қилиш учун келганлигига урғу берди.
Остонада томонлар ўртасидаги музокаралар доирасида икки томонлама ва уч томонлама учрашувлар ёпиқ шаклда бўлиб ўтади. Барча иштирокчиларнинг катта стол атрофида тўпланиши эса чоршанба кун амалга оширилади.
