Қозоғистон қирғиз гўшти ва сутини ўз ҳудуди бўйлаб автомобилда олиб ўтишни тақиқлади
“Kun.uz” сайтининг хабар қилишича, Қозоғистон 2017 йилнинг 1 январидан бошлаб қирғиз гўшти ва сут маҳсулотининг ўз ҳудуди бўйлаб автомобиль транспорти орқали транзитини тақиқлади. Бундай хат Қирғизистон қишлоқ хўжалиги вазирлиги Давлат ветеринар ва финосанитар инспекциясига юборилган.
Унга кўра, 15 корхона маҳсулоти тақиқланган. Улар Россия рўйхатига 2016 йилнинг февралида киритилган. Бу корхоналар ўз маҳсулотини РФ ҳудудида сотиш ҳуқуқига эга, бироқ Қозоғистон реестрига киритилмаган. Уларга маҳсулотни фақатгина темир йўл транспорти орқали олиб ўтишга рухсат берилди.
Қирғизистон ҳукумати Қозоғистон раҳбариятига вазият юзасидан изоҳ беришни сўраб мактуб йўллади. Хусусан, қозоғистонликлар нима учун қишлоқ хўжалиги вазирлиги транспорт соҳасидаги сиёсатни белгилаётганини тушунтириб беришлари керак.
Қирғизистон вазирлар маҳкамаси Евроосиё иқтисодий комиссиясига ҳам мурожаат қилган. У бу масалани 2017 йилнинг 13 январь куни кўриб чиқади.
Туркистон:
Маълумки, Қирғизистон президенти Алмазбек Атамбаев Санкт-Петербергда бўлиб ўтган ЕОИИ давлат раҳбардлари йиғилиши чоғи журналистларга берган интервьюсида Қирғизистонни ЕОИИга аъзо бўлиши мамлакатда салбий из қолдираётгани ҳақида нолиган ва Божхона кодексини имзолашни пайсалга солган эди. Атамбаев бунга асосий сабаб қилиб Қозоғистон ҳукуматини ветеринар назоратини баҳона қилиб Қирғизистонда етиштирилган қишлоқ хўжалик махсулотларини ўз ҳудуди орқали ўтишида тўсиқлар пайдо қилаётганини келтириб ўтган эди.
Атамбаевнинг бу ҳаракати ортидан Қозоғистон ветеринария соҳасида техник ёрдам кўрсатиш учун 100 миллион доллар ажратишга ваъда берган ва президент томонидан Божхона кодекиси имзолаган эди. Қозоғистон ҳукумати Қирғизистонга ваъда қилган пул ажратилмай туриб қозоқ томони яна бир хунарини ишга солди. Эндиликда Қирғизистонда етиштирилган сут ва гўшт маҳсулотлари қозоқ ҳудудидан фақат темир йўл орқали олиб ўтилишини маҳлум қилди.
Россия бошчиигида тузилган Евроосиё иқтисодий иттифоқи Қозоғистонга қўл келди. Қозоғистон вазиятдан фойдаланиб ўзининг дехқон ва ишбилармонларини ҳимоя қилиш мақсадида, Қирғизистондан иттифоқ мамлакатлари бозорларига ўтиб бораётган баъзи маҳсулотларни Евроосиё иттифоқи ҳудудига киришдан ман қила бошлади. Яъни ўзида ишлаб чиқарилаётган махсулотлар ва етиштирилаётган мева, чорва ва сабзавотларни ташкилотга аъзо давлатлар бозорига етказиб бериб, Қирғизистондан келадиганини деярли ўтказмай қўйди. Бу кетишда Қирғизистондаги дехкон ва фермерлар банкрот бўлиб, ишсиз қолган савдогарлар каби Россия ва Қозоғистонда қора ишчилар сафини тўлдиришдан бошқа чоралари қолмайди. Қозоғистон ваъда қилган 100 миллион долларни эса берилишидан берилмаслиги аниқроқ.
