Қирғизистон Оролни қутқариш халқаро жамғармасидаги ўз иштирокини “музлатиш” тўғрисида қарор қабул қилди. Бу ҳақда Европа иттифоқи-Марказий Осиё олий даражадаги диалогнинг 2016 йил 18 май куни Брюсселда ўтаётган 3-мажлиси давомида Қирғизистон ташқи ишлар вазирининг биринчи ўринбосари Динара Кемелова маълум қилди.
Динара Кемелова мажлис иштирокчиларининг эътиборини Маракаий Осиёда сув-энергетика ҳамкорлиги муаммоларига, Марказий Осиёнинг алоҳида олинган мамлакатларининг гидроэнергетик жиҳатларини ва эҳтиёжларини ҳисобга олмаётган Оролни қутқариш халқаро жамғармасининг фаолиятига қаратди. “Қирғизистон томони жамғарманинг бўйича таклиф этган ислоҳоти амалга оширилмади, – дейилади Қирғизистон ТИВ баёнотида. – Шу муносабат билан Қирғизистон Жамғарма ва унинг органлари фаолиятида ўз иштирокини “музлатишга” қарор қилди”.
Динара Кемелова, шунингдек, Оролни қутқариш халқаро жамғармасининг тўлаформатли ислоҳоти ўтказилмас экан, Қирғизистон унинг фаолиятида иштирок этишини қайта тиклаш истиқболларини кўрмаслигини қайд этиб ўтди.
Оролни қутқариш халқаро жамғармаси Марказий Осиё давлатлари раҳбарларининг 1993 йил 4 январида Тошкентда қабул қилган қарорига мувофиқ тузилган. Жамғарманинг асосий вазифаси – минтақанинг барча мамлакатлари манфаатларини ҳисобга олган ҳолда Оролни қутқариш бўйича қўшма дастурлар ва амалий ҳарактларни молиялаштириш, Оролбўйи ва Орол денгизи бассейнини экологик жиҳатдан соғломлаштириш деб қабул қилинган. Жамғарманинг муассислари – Ўзбекистон, Қозоғистон, Тожикистон, Қирғизистон ва Туркманистон.
Манба: “Фарғона” ахборот агентлиги
