2015 йилнинг октябрида 50 сонли қамоқхонадан 9 нафар маҳбусни қочиши МХДҚ томонидан режалаштирилган махсус амалиёт бўлган. Бу ҳақида 26 январ куни бўлиб ўтган матбуот анжуманида Жазони ижро этиш давлат хизмати (ЖИЭДХ)нинг истеъфодаги полковниги Эрнст Исаев ЖИЭДХ раиси Алик Мамирқуловга таянган ҳолда маълум қилди.
Унинг сўзларига кўра, 50- сонли қамоқхона бошлиғи Иманқул Тельтаев ўлик ҳолда топилганидан сўнг у ЖИЭДХ раиси Алик Мамирқулов олдига кирган. Мамирқулов эса бу МХДҚнинг махсус амалиёти бўлгани сабабли ЖИЭДХ ходимлари бу ишга ҳеч қандай таъсир ўтказа олишмаганини маълум қилган.
“Маҳбуслар қочганидан сўнг қамоқхона раҳбарият олдида маълум вазифалар бор эди, мен бу ишга аралашмадим. Аммо қамоқхона бошлиғи ўлдирилганидан сўнг мен, ЖИЭДХ фахрийси сифатида, содир бўлаётган ишлардан воқиф бўлиш мақсадида А. Мамирқулов олдига кирдим. Аммо генерал Алик Мамирқулов менга, бу вазиятда, 50- сонли қамоқхонадан маҳбуслар қочган вақтда ЖИЭДХ ходимлари ҳеч нарса қила олишмагани, чунки бу МХДҚнинг махсус амалиёти бўлганини айтди. Агар керак бўлса юқори даражали зобитлар менинг сўзимни тасдиқлашлари мумкин, Мамирқуловнинг бу ишларга муносабати айнан шундай бўлган”, – дея айтиб ўтди Исаев.
У, шунингдек, қочиш содир бўлишидан бир неча кун олдин А.Мамирқулов номига маҳбуслар қочишга тайёргарлик кўраётгани ҳақидаги маълумот билан МХДҚдан хат келганини таъкидлаб ўтди.
“Қочиш содир бўлишидан бир неча кун олдин генерал Алик Мамирқулов номига МХДҚдан маҳбуслар қочишга тайёргарлик кўраётгани ҳақида хат келган. Аммо ЖИЭДХ раҳбарияти томонидан бунга ҳеч қандай муносабат билдирилди, ҳеч қандай чора кўрилмаган, ЖИЭДХ ходимлари бу ҳақида огоҳлантирилмаган”, – деди Исаев.
