Ҳукумат матбуот хизматининг хабар беришича, Қирғизистон бош вазири Темир Сариев 12 январ куни Хитойнинг Қирғизистондаги элчиси Ци Даюй билан учрашди.
“Менинг Хитойга қилган расмий сафарим чоғида муҳокама қилинган муҳим масалалар орасида иккитомонлама ҳамкорликнинг энг истиқболли йўналишларидан бўлган уч йўналишни таъкидлаб ўтишни истар эдим. Хусусан, Хитой-Қирғизистон темир йўлини барпо этиш, иккинчиси, Иссиқкўл кўли атрофида халқа йўл қурилишида Хитой сармоясини жалб этиш ва учинчиси, ортиқча саноат корхоналарини Хитойдан Қирғизистонга кўчириш устида сўз кетмоқда”, -деди Темир Сариев.
Бош вазирнинг қайд этишича, ўзининг Хитойга қилган расмий сафаридан сўнг Қирғизистон иқтисодиёт вазирлигига қисқа вақт ичида Қирғизистон учун зарур бўлган саноат кархоналар рўйхатини Хитой ҳукуматига юбориш вазифаси топширилган.
Ўз навбатида Хитойнинг Қирғизистондаги элчиси Ци Даюй Хитой томони зарур бўлган барча чораларни кўриш ва белгиланган режаларни амалга оширишда ёрдам беришини таъкидлаб ўтди.
“Мен бугуноқ ХХР бош вазирини ўтказилган музокаралар тўғрисида хабардор қиламан. Қирғиз томони таклиф этаётган лойиҳаларни амалга оширишда Хитой Қирғизистон билан ҳамкорлик қилишдан манфаатдор. Умуман олганда биз, икки давлат манфаатларига жавоб берувчи турли соҳаларда ҳамкорликни фаол кенгайтириш ниятидамиз”, – деди Ци Даюй.
