Қирғизистон ҳукумати Россия босими остида мамлакатни Евроосиё иқтисодий иттифоқига олиб киргунга қадар “Қирғизистон учун 170 миллион кишилик бозор очилиши ва инвестиция муҳити яхшиланиши” ҳақида тинмай гапириб, халқнинг қўйнини пуч ёнғоқ билан тўлдириб келди. Мана Қирғизистон ЕОИИга аъзо бўлиб кирганига ҳам ярим йил бўлиб қолди. Ўтган вақт мобайнида эса Қирғизистон иқтисоди бу аъзоликдан кўргани зарардан бошқа нарса бўлмаяпти.
Авваламбор расмий ҳукумат айтганидек, Қирғизистон учун 170 миллион кишилик бозор очилиши ўрнига Россия учун орзон ишчи кучи бозори янада кенгайди. Чунки, Марказий Осиёда энг йирик улгуржи бозорлар бўлган “Дўрдой” ва “Қарасув” бозорларидаги савдо хажми 70-80 фоизга тушиб кетиши натижасида бу бозорларда тирикчилик қилиб келган минглаб одамлар Россиядаги меҳнат муҳожирлари сафига бориб қўшилишга мажбур бўлдилар. Мазкур бозорларда савдо ҳажмининг тушиб кетиши эса ўз навбатида қўшни Қозоғистон билан савдо айланмасини камайиб кетишига олиб келди. Бунга асосий сабаб эса, Қирғизистон Қозоғистонга асосан Хитойдан олиб келинган товарларни реэкспорт қилиб келар эди.
Қирғизистон давлат божхона хизмати берган маълумотларга кўра, ўтган 2015 йилнинг 11 ойи мобайнида Қирғизистон ва Қозоғистон ўртасида савдо ҳажми 1,8 боробарга камайиб кетди.
Ўтган йилнинг 11 ойи мобайнида икки давлат ўртасидаги савдо ҳажми 472 миллион 691 минг долларни ташкил этган бўлса, 2014 йилнинг шу вақти мобайнида эса бу кўрсаткич 858 миллион 509 минг долларни ташкил этган эди.
Қозоғистондан импорт қилинадиган махсулотлар миқдори айни даврга солиштирганда 518 миллион 117 минг доллардан 321 миллион 991 минг долларга тушиб кетган бўлса, экспорт ҳажми эса, 340 миллион 392 минг доллардан 150 миллион 700 минг долларга тушиб қолди.
