Президент матбуот хизматининг хабар қилишича, Алмазбек Атамбаев иш сафари билан Қозиғистонга учиб кетган.
Иш сафари доирасида Атамбаев 16 октябр куни бўлиб ўтадиган Мустақил Давлатлар Ҳамдўстлиги (МДҲ) давлат раҳбарлари кенгаши ва Евроосиё иқтисодий иттифоқи олий кенгаши йиғилишида иштирок этади.
Расмий хабарларга кўра, МДҲ саммити кун тартибида жами 17 масала кўриб чиқилади. Даставвал МДҲ раҳбарлари тор доирада БМТ ташкил топганини 70 йиллиги муносабати билан баёнот, халқаро терроризмга қарши кураш тўғрисидаги баёнот, кейинги йилда МДҲ раислик қилиш ва МДҲ давлат раҳбарларининг кейинги йиғилиши ўтадиган жой масаласини муҳокама қилишади.
Шунингдек, саммитда МДҲга аъзо мамлакатлар орасида 2020 йилгача ҳарбий ҳамкорлик концепциясининг қабул қилиниши, ташқи чегаралар хавфсизлигини таъминлаш бўйича 2016-2020 йилларга мўлжалланган дастур ҳамда фавқулодда ҳолатлар олдини олиш бўйича ҳамкорлик дастурининг тасдиқланиши кутилмоқда.
