Хитой ташқи ишлар вазирининг ёрдамчиси Чэн Гопин “Радикал Исломий террор” масаласида АҚШнинг террорга (Исломга) қарши кураш координатори Тина Кейденау билан учрашди. Бу ҳақида Гонг Конгда чиқадиган “South China Morning” газетаси хабар тарқатди. Хабарга кўра, Чэн Гопин “Шарқий Туркистон Исломий ҳаракати” уйғурларни Сурия ва Ироққа жалб қилиб, уларни жиҳод ғояси билан суғораётганлиги устидан АҚШлик масъулга арз қилган.
“Радикал Исломий террор” таҳдиди кундан кунга мураккаблашиб, жиддий тус олганлигини билдирган Хитой масъули бу нарса бутун дунё учун катта хатар эканлигини таъкидлади.
“Биз учрашув чоғида Шарқий Туркистон Исломий ҳаракати каби террорчи гуруҳлар Хитой, АҚШ ва халқаро ҳамжамиятга жиддий таҳдид туғдиришига урғу бердик. Уларга қарши кураш олиб бориш учун тўлиқ ёрдам беришларини АҚШдан талаб қилдик”, деди Хитой ташқи ишлар вазирининг ёрдамчиси.
Хитой ташқи ишлар вазирлиги тарафидан тарқатилган баёнотда АҚШ ва Хитой “террор”га ва “экстримизм”га қарши курашда келишиб олишгани қайд этилди. Келишувга кўра, террорга (Исломга) қарши кураш борасида икки давлат ўртасида разведка алоқалари кучайтирилади.
Ўтган ҳафта икки кунлик расмий сафар билан Хитойга борган Туркия президенти Ражаб Тоййиб Эрдуғон ҳамкасби Си Цзиньпин билан учрашган пайтда “Шарқий Туркистон” Исломий ҳаракатини террорчи ҳаракат сифатида қабул қилишини билдирган эди.
Хитойнинг шимолий ғарбида жойлашган Шинжон минтақаси охирги уч йилди ҳукумат кучлари тарафидан жуда кўп босқинларга учради, сон саноқсиз мусулмонлар қатл қилинди. Ҳукумат кучлари қилган барча жиноятларини “террорга қарши кураш” баҳонасида амалга ошириб келмоқда. Хитой ҳукумати ўзининг қирғинларига “Шарқий Туркистон” Исломий ҳаракатини жавобгар деб билади. Аммо халқаро инсон ҳуқуқлари ташкилотлари мазкур ҳаракатнинг террорчи ҳаракат эканлигига, ҳатто унинг ҳаётда мавжудлигига шубҳа уйғотувчи далилларни олға суради.
