Қирғизистон республикаси Миллий хавфсизлик давлат қўмитаси матбуот хизматининг хабар қилишича, Бишкекда 16 июнь куни кечқурун шаҳар марказида ўтказилган махсус амалиёт пайтида 6 одам ўлдирилган ва 5 киши қўлга олинган.
МХДҚ хабарига кўра, улар 17 июл куни Бишкек бош майдонида ўқиладиган ҳайит намози пайтида портлашларни содир этишни режалаштиришган.
Бишкек марказидаги Панфилов ва Горький кўчалари кесишган жойда махсус амалиёт маҳаллий вақт билан соат 19 да бошланиб, 21.30гача давом этди. Амалиётда юздан ортиқ махсус хизмат ходимлари иштирок этган. Бу ердаги отишма пайтида 4 киши ўлдирилган, махсус хизматларнинг 4 ходими яраланган. Жангарилар яширинган уйда ёнғин содир бўлиб, унга туташ бўлган бир нечта уйларга зарар етган.
Яна икки киши Бишкекдан 15 километрча узоқликдаги ГЭС-5 кичик туманида олиб борилган махсус амалиёт пайтида йўқ қилинган.
Махсус амалиёт пайтида ўлдирилганлардан бири яқинда Бишкекдаги қамоқхонадан қочган Қозоғистон фуқароси, 27 ёшли Жанбўлўт Амиров экани хабар қилинди. У 25 июн куни яна бир қозоғистонлик, 24 ёшли Альберт Абхин Сатибалди ўғли билан қамоқдан қочган эди. Сатибалди ўғли 26 июнь куни қўлга олиш жараёнида ўзини граната билан портлатиб юборган. Жанбўлўт Амиров эса яширинишга муваффақ бўлган эди.
24.kg сайтининг хавфсизлик қўмитасидаги манбага таяниб хабар қилишича, қўлга олинган ва йўқ қилинганлар “Исломий Давлат” гуруҳининг аъзолари бўлганлар.
Ходиса гувоҳларининг сўзларига кўра, амалиёт бошланишидан олдин махсус хизмат ходимлари жангарилар яшириниб олган уйга туташ бўлган тикувчилик цехидаги барча кузатиш камераларини йиғиштириб олишган ва бутун кварталга электр токи етказиб берилиши тўхтатилган. Барчага қўшниларга кўча чиқмаслик ва ҳатто деразадан қарамаслик тайинланган.
