Туркия ташқи ишлар вазирининг маслаҳатчиси Фаридун Синирлиўғли Италия пойтахти Римда Исроил ташқи ишлар вазирлигининг бош директори Доре Голд билан махфий учрашув ўтказгани айтилмоқда. Бу ҳақида Исроилнинг машҳур газеталаридан бири “Гаарец” газетаси ўзининг электрон сайтида хабар тарқатди. Махфий учрашув Туркиядаги сайловлардан сўнг бўлиб ўтганлигини ёзган газетанинг электрон сайтида учрашувга оид батафсил маълумот тарқатилмади.
Газетанинг ёзишича, Туркияда Исроиллик масъуллар ҳақида юритилаётган даъволар Турк парламенти чиқарадиган бир қонун билан тугатилиши ва икки давлат ўртасидаги алоқаларнинг барқарорлашуви борасида ҳам битимлар тузилган.
Фотожурналистлар уюшмаси кенгаш аъзолари билан учрашув ўтказган Туркия ташқи ишлар вазири Мавлут Чувашўғли Туркия ва Исроил ўртасида ўтган махфий учрашувни тасдиқлади.
“Ўзаро алоқалар барқарорлашуви учун икки давлат ўртасида учрашувлар бўлиб туриши табиий ҳол. Ҳеч учрашмасдан, қандай қилиб алоқаларни давом эттириш мумкин? Бу учрашувлар энди бўлаётган иш эмас. Тарихдан буён бу икки давлат экспертлар даражасида учрашиб келмоқда. Бир соҳада битим туздик. Аммо биз истаган икки соҳада (яъни Мови Мармара ҳодисасида ўлдирилганлар оиласига товон тўлаш ва Ғазо минтақасининг қамал қилинишини тўхтатиш соҳасида) копток қарши тарафда. Биз улардан жавоб кутяпмиз”, деди Туркия ташқи ишлар вазири.
