Испаниянинг Севилья шаҳрида жойлашган Airbus Defence and Space (ADS) корхонасида споттерлар томонидан Ўзбекистон ҳарбий ҳаво кучлари белгиларига эга Airbus C295W ҳарбий-транспорт самолётлари қайд қилинди.
Самолётнинг борт рақами “01 оқ”, серия рақами – 137.
С295W С295М ҳарбий-транспорт самолётининг охирги модификацияси ҳисобланади. У 2013 йили биринчи марта тақдим этилган.
Ўзбекистон бу борада шартнома имзолагани ҳақидаги ахборот матбуотда эълон қилинмаган эди. Йил бошида ADS 8та самолётга буюртма олганини маълум қилган эди. Орадан бироз вақт ўтиб, бу самолётларнинг 4таси Саудия Арабистони ички ишлар вазирлиги томонидан буюртма қилингани аниқланди. 17 июнь куни интернетга чиққан расмлар асосида қолган самолётларнинг буюртмачиси Ўзбекистон эканлиги айтилмоқда.
Шу тариқа, Ўзбекистон МДҲ ҳудудида бундай русумдаги самолётни сотиб олган иккинчи давлат (Қозоғистондан кейин) бўлади.
Туркистон:
Ўзбекистон ҳукумати минтақада етакчи ҳарбий қувватни қўлдан бермаслик мақсадида улкан маблағларни сарф қилиб келмоқда. Ўтган йили Ўзбекистон Хитойдан ўрта масофага мўлжалланган HQ-9 зенит-ракета комплексини харид қилган бўлса, ундан аввалроқ Хитойнинг Chengdu Aircraft Industry Corporation компанияси томонидан ишлаб чиқарилган учувчисиз ҳаракатланадиган Pterodactyl (Yilong-1) ҳужум қилувчи комплектини харид қилгани ҳақида хабарлар тарқаган эди.
Бундан ташқари Ўзбекистон ҳукумати Афғонистонда ўз қўшинларини олиб чиқаётган АҚШ, Британия ва Германияга мурожаат қилиб, зирҳли машиналар, мина детекторлари, вертолётлар, навигация қурилмалари ва тунда кўриш ускуналарини қолдиришни таклиф қилган, ўз навбатида Буюк Британия мудофаа вазири Филипп Ҳаммонд қўшинларини Афғонистондан хавфсиз олиб чиқиб кетилиши эвазига Буюк Британия Ўзбекистонга қурол ва ҳарбий техника сотишга қарор қилганини хабар қилган эди.
Шу билн бирга Ўзбекистон АҚШдан ҳарбий ёрдам сифатида минага қарши V шаклдаги бронетранспортерлар, 14-18 тоннагача бўлган Mine-Resistant Ambush Protected vehicles (MRAPs) номли машиналардан 308 тасини олган. Яна 20 та зирҳли таъмирлаш эвакуация қилувчи машиналар ҳам олиши ва бу ишлар яқин вақтларда ниҳоясига етказилиши хабар қилинган эди.
Global Firepower ташкилоти эълон қилган рейтингда Ўзбекистон ҳарбий салоҳияти бўйича 126 мамлакат орасидан 54-ўринни эгаллаб минтақадаги ўз етакчилигини эгаллаб турганлиги хабар қилинган эди. Тадқиқотчилар ушбу рейтингни тузиш учун 50та омилни таҳлилдан ўтказиб, шу асосда ҳар бир давлатнинг ҳарбий салоҳиятини аниқлашга ҳаракат қилган. Ҳарбий хизматга лаёқатли аҳоли сони, ҳарбий техника миқдори, географик жойлашув, иқтисодий имкониятлар шулар жумласидандир.
Рейтингда Ўзбекистон 54-ўринни эгаллади. Бу минтақа давлатлари орасида биринчи кўрсаткичдир. Қозоғистон 66, Қирғизистон 78, Тожикистон 81, Туркманистон 90, Афғонистон 102-ўринни эгаллади.
